युद्धाचे सावट! अमेरिका-इराण तणाव वाढला; भारतीय नागरिकांना तातडीने देश सोडण्याचा सल्ला

America-Iran: भारतीय दूतावासाने आपल्या नागरिकांना तात्काळ इराण सोडण्याचा सल्ला दिला आहे.

America-Iran:इराण आणि अमेरिका यांच्यातील वाढत्या तणावाच्या पार्श्वभूमीवर तेहरानमधील भारतीय दूतावासाने 23 फेब्रुवारी 2026 रोजी महत्त्वाची सूचना (Advisory) जारी केली आहे. या सूचनेत इराणमध्ये वास्तव्यास असलेल्या भारतीय नागरिकांना(विद्यार्थी, तीर्थयात्री, व्यापारी आणि पर्यटक) उपलब्ध सर्व साधनांचा, विशेषतः व्यावसायिक विमानसेवेचा वापर करून तातडीने इराण सोडण्याचा सल्ला देण्यात आला आहे.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

बदलत्या परिस्थितीचा इशारा

दूतावासाने स्पष्ट केले आहे की, 5 जानेवारी 2026 रोजी भारत सरकारने जारी केलेल्या सल्ल्याच्या पुढील टप्प्यात आणि इराणमधील बदलत्या सुरक्षास्थितीच्या पार्श्वभूमीवर, इराणमध्ये असलेल्या भारतीय नागरिकांनी उपलब्ध वाहतुकीच्या साधनांचा वापर करून देश सोडावा.

pic.twitter.com/hVDwTTdhja

— India in Iran (@India_in_Iran) February 23, 2026

नागरिकांना सतर्कतेचा सल्ला

याआधी 14 जानेवारी 2026 रोजी जारी करण्यात आलेल्या सूचनेची आठवण करून देत दूतावासाने नागरिकांना अत्यंत सावध राहण्याचे, कोणत्याही प्रकारच्या आंदोलनांपासून दूर राहण्याचे, दूतावासाच्या सतत संपर्कात राहण्याचे आणि प्रवास व ओळखपत्रे (पासपोर्ट, व्हिसा आदी) नेहमी तयार ठेवण्याचे आवाहन केले होते.

नोंदणी न केलेल्यांना तातडीची सूचना

दूतावासाने सांगितले आहे की, ज्या भारतीय नागरिकांनी अद्याप दूतावासात नोंदणी केलेली नाही, त्यांनी अधिकृत लिंकद्वारे तात्काळ नोंदणी करावी. इराणमध्ये इंटरनेट अडचणींमुळे नागरिकांना स्वतः नोंदणी करता येत नसेल, तर भारतामधील त्यांच्या कुटुंबीयांनी ही प्रक्रिया पूर्ण करावी.

आपत्कालीन हेल्पलाइन क्रमांक जाहीर

कोणत्याही मदतीसाठी भारतीय दूतावासाने खालील आपत्कालीन संपर्क क्रमांक +989128109115, +989128109109, +989128109102, +989932179359 जाहीर केले आहेत. याशिवाय नागरिक cons.tehran@mea.gov.in या ई-मेलवरही संपर्क साधू शकतात.

अमेरिकेचा अल्टीमेटम, युद्धाची भीती

ही सूचना अशा वेळी जारी करण्यात आली आहे, जेव्हा इराणच्या अणु कार्यक्रमावरून अमेरिका आणि इराणमधील तणाव टोकाला पोहोचला आहे. अमेरिकेचे राष्ट्राध्यक्ष डोनाल्ड ट्रम्प यांनी इराणला 10 ते 15 दिवसांत नवीन अणु करारासाठी तयार होण्याचा अल्टीमेटम दिला असून, अपयश आल्यास गंभीर परिणाम भोगावे लागतील, असा इशाराही दिला आहे.

दरम्यान, अमेरिकेने मध्य पूर्वेत मोठ्या प्रमाणावर लष्करी तैनाती केली असून युद्धनौका, लढाऊ विमाने, इतर सैन्य संसाधने तैनात करण्यात आली आहेत. इराणमध्ये सध्या विरोधी आंदोलने, झडपा-झडपी आणि अस्थिरतेचे वातावरण वाढत आहे. सुरक्षा परिस्थिती नाजूक बनली असून, अमेरिकेच्या संभाव्य लष्करी कारवाईमुळे संपूर्ण प्रदेशात युद्धाचा धोका निर्माण झाल्याचे तज्ज्ञांचे मत आहे.