हिंगोली : जिल्ह्यातील १३ पैकी निम्मे पोलीस ठाण्यांतील टेलिफोन नंबर बंदच राहत आहेत. त्यामुळे एखाद्या घटनेची तत्काळ माहिती द्यायची असल्यास अधिकारी, कर्मचाऱ्यांच्या वैयक्तिक नंबरची शोधाशोध करावी लागत असल्याचे चित्र आहे. पोलीस ठाण्याला दिलेले टेलिफोन बंद का ठेवले जात आहेत, असा प्रश्न उपस्थित होत आहे.
जिल्हाभरात हिंगोली शहर, हिंगोली ग्रामीण, आखाडा बाळापूर, औंढा नागनाथ, बासंबा, वसमत शहर, वसमत ग्रामीण, गोरेगाव, हट्टा, कळमनुरी, कुरुंदा, नरसी नामदेव, सेनगाव अशी १३ पोलीस ठाणे कार्यरत आहेत. काही पोलीस ठाण्यांतर्गत डोंगरी भाग येतो. तसेच काही भागात दररोजच काही ना काही घटना घडत आहेत. त्यामुळे पोलिसांना २४ तास सतर्क राहावे लागत आहे. त्यात कोरोना संसर्गजन्य आजाराने पोलिसांचे काम वाढविले आहे. पोलीस प्रशासन अशाही स्थितीत नागरिकांच्या सुरक्षेची जबाबदारी समर्थपणे पेलत आहे. या कामात गती येण्यासाठी तसेच पोलीस ठाण्यांशी तत्काळ संपर्क साधता यावा यासाठी पोलीस प्रशासनाने प्रत्येक पोलीस ठाण्याला टेलिफोन (मोबाइल) दिले आहेत. नागरिकही आपल्या क्षेत्रातील पोलीस ठाण्याचा नंबर नेहमी लक्षात ठेवतात. मात्र काही दिवसांपासून १३ पैकी निम्मे पोलीस ठाण्यांचे टेलिफोन नंबरच लागत नसल्याचा आरोप होत आहे. यासाठी पोलीस ठाण्याच्या टेलिफोन नंबरवर संपर्क साधून खात्री केली असता असता मोजक्याच पोलीस ठाण्यांचा टेलिफोन नंबर सुरू असल्याचे स्पष्ट झाले. यामुळे दुर्गम भागात काही घटना, अपघात घडल्यास पोलीस ठाण्याशी कसा संपर्क साधावा, असा प्रश्न निर्माण होत आहे.
..पोलीस ठाण्यांचा नंबर बंदच
पोलीस ठाण्यांचा संपर्क नंबर बंदच असतो, असा आरोप होत असल्याने यासंदर्भात पडताळणी केली असता सायंकाळी ६ ते ६.१५ वाजेच्या दरम्यान जिल्ह्यातील हिंगोली शहर, बासंबा, गोरेगाव, सेनगाव, हट्टा, कळमनुरी, वसमत ग्रामीण अशा सात पोलीस ठाण्यांचा संपर्क नंबर बंद आढळून आला. या पोलीस ठाण्याचा संपर्क नंबर नेहमीच बंद राहत असल्याचा आरोपही होत आहे, तर इतर पोलीस ठाण्यांचा संपर्क नंबर सुरू असल्याचे पहावयास मिळाले.