हिंगोली : अनैतिक संबंधाच्या रागातून मित्रानेच राज्य राखीव पोलीस दलातील जवानाचा खून केल्याचा संशय व्यक्त होत आहे. १७ मार्च रोजी एका जवानाचा मृतदेह विहीरीत आढळून आला होता. याप्रकरणी पोलिसांनी जवानाच्या मित्रास चौकशीसाठी ताब्यात घेतले असून लवकरच खूनाचे रहस्य उलगडणार आहे.
हिंगाेली राज्य राखीव पोलीस दलातील जवान राजकुमार उत्तमराव पवार (वय ३७) यांचा १७ मार्च रोजी लोहगाव शिवारातील एका विहिरीत मृतदेह आढळून आला होता. त्यांना जबर मारहाण केल्याचे दिसत होते. घटनेची माहिती मिळताच अतिरिक्त पोलीस अधिक्षक यशवंत काळे, उप विभागीय पोलीस अधिकारी यतीश देशमुख, सपोनि. बी.आर. बंदखडके, पोउपनि. कांबळे यांनी घटनास्थळी धाव घेत पाहणी केली. याप्रकरणी हिंगोली ग्रामीण पोलीस ठाण्यात रात्री उशिरा उत्तमराव पवार यांच्या फिर्यादीवरून बंडू श्यामराव चव्हाण (रा. जांभळी तांडा, ह.मु. पेन्शनपुरा हिंगोली) याच्याविरूद्ध गुन्हा दाखल करण्यात आला.
त्यांनी दिलेल्या फिर्यादीत म्हटले आहे की, १६ मार्च रोजी राजकुमार पवार हे त्यांचा मित्र बंडू श्यामराव चव्हाण यांच्या सोबत भगवान आडे यांना भेटण्यासाठी कारने जांभरून येथे गेले होते. पाहुण्याला भेटल्यानंतर ते परत येत असताना लोहगाव शिवारात रात्री ९ वाजेच्या सुमारास एका दुसऱ्या वाहनासोबत झालेल्या अपघातावरून चौघांसोबत त्यांचा वाद झाला होता. याच संधीचा फायदा घेत बंडू चव्हाण याने राजकुमार पवार यांना जबर मारहाण करून खून करत प्रेत लोहगाव शिवारातील एका विहीरीत टाकून दिले. या प्रकार अनैतिक संबंधातून झाला असल्याचे फिर्यादीत म्हटले आहे.
दरम्यान, सपोनि बी.आर. बंदखडके यांनी पोलीस उपनिरीक्षक आर.व्ही. तायडे, रविकांत हारकळ, शेख महमंद, अशोक धामणे, चव्हाण आदींचे पथक तयार करून आरोपीचा शोध घेण्याच्या सूचना दिल्या होत्या. हे पथक रात्रभर आरोपीचा शोध घेत होते. अखेर १८ मार्च रोजी सकाळी ६ वाजता पोलिसांनी संशयित आरोपी बंडू चव्हाण यास रेल्वेस्थानक परिसरातून ताब्यात घेतले.