वसमत तालुक्यातील गुंज येथे रोखला बालविवाह

माहिती जिल्हा बालसंरक्षण कक्ष, नांदेड यांच्याकडून याबाबत हिंगोलीच्या कक्षास माहिती मिळाली होती. त्याआधारे जिल्हा महिला व बालविकास अधिकारी विठ्ठल शिंदे यांच्या मार्गदर्शनाखाली तसेच जिल्हा बालसंरक्षण अधिकारी सरस्वती कोरडे यांनी कार्यवाही केली. सध्याच्या लॉकडाऊनच्या काळातही लग्नसराई सुरूच आहे. वसमत तालुक्यातील गुंज या गावात बालविवाहाचे आयोजन करण्यात आले होते. सदर बालविवाह होत असल्याची चाहूल लागताच जिल्हा बालसंरक्षण कक्षातील बालसंरक्षण अधिकारी गणेश मोरे, बालसंरक्षण अधिकारी जरीब खान पठाण, सामाजिक कार्यकर्ता रामप्रसाद मुंडे, पोलीस हेडकॉन्स्टेबल वा.जी. वाघमारे यांनी सदरील गावातील ग्रामसेवक ए.पी. गिते, सरपंच सत्यभामा नरवाडे, पोलीसपाटील अंकुश सूर्यवंशी, उपसरपंच, शाळा व्यवस्थापन समिती अध्यक्ष, अंगणवाडीताई जया जनकवाडे यांच्या समक्ष मुलाच्या आई, वडील, मामा यांची भेट घेतली, तर बालविवाह करणे हा कायद्याने गुन्हा आहे. तसेच या गुन्ह्यास एक लाख रुपये दंड व दोन वर्ष सक्तमजुरीची शिक्षा अशा दोन्ही शिक्षा होऊ शकतात, असे समुपदेशन केले. संबंधितांचा ग्राम बालसंरक्षण समिती समक्ष लेखी जबाब लिहून घेण्यात आला.