दरड कोसळून युवतीचा मृत्यू

घरातील सारवणासाठी खडी आणण्यासाठी गेलेल्या १९ वर्षीय युवतीच्या अंगावर दरड कोसळल्याने तिचा मृत्यू झाला. ही दुर्घटना सिरोली (महागाव) येथे आज (१७) सकाळी ८.३० वाजता घडली.

अर्जुनी/मोरगाव : घरातील सारवणासाठी खडी आणण्यासाठी गेलेल्या १९ वर्षीय युवतीच्या अंगावर दरड कोसळल्याने तिचा मृत्यू झाला. ही दुर्घटना सिरोली (महागाव) येथे आज (१७) सकाळी ८.३० वाजता घडली. प्राथमिक आरोग्य केंद्र महागाव येथे वेळेवर एकही वैद्यकीय अधिकारी उपलब्ध नसल्यामुळे संतप्त जमावाने धुमाकूळ घातला. लेखी आश्वासनानंतर समजूत घातल्यानंतर त्या युवतीवर शोकाकूल वातावरणात अंत्यसंस्कार करण्यात आले.
प्राप्त माहितीनुसार सिरोली येथील सिंधू गुलाब चौधरी ही मंगळवारला सकाळी आपल्या दोन मैत्रिणीसोबत घरातील सारवणासाठी खडी आणायला गेली होती. खडी काढण्यासाठी ती खड्यात उतरली. खडी काढत असतांनाच अचानक मातीचा ढिगारा तिच्या अंगावर कोसळला. यात ती गंभीर जखमी झाली. तिला उपचारासाठी प्राथमिक आरोग्य केंद्र महागाव येथे आणण्यात आले. यावेळी वैद्यकीय अधिकारी डॉ. चांदेकर हे विना अर्जाने गैरहजर होते. येथे सिंधूवर उपचारच झाले नाहीत. त्याच अवस्थेत तिची सुमारे पाऊण तासपर्यंत मृत्यूशी झुंज सुरू होती. त्यावेळी सिरोली व महागाव येथील हजारो महिला-पुरूष प्रा.आ.केंद्रावर चालून गेले त्यांनी डॉ. चांदेकर यांचे प्रती संताप व्यक्त केला.
त्याचवेळी परिस्थितीचे गांभीर्य लक्षात घेवून सामाजिक कार्यकर्ते प्रदीप मस्के व सरपंच रुपचंद खोब्रागडे यांनी संतप्त जमावाची समजूत घातली व त्या युवतीला ग्रामीण रुग्णालय अर्जुनी/मोरगाव येथे हलविले. अगदी ग्रामीण रुग्णालय परिसरात पोहोचताच त्या युवतीचा मृत्यू झाला. गावात युवतीच्या मृत्यूची वार्ता पसरताच जमाव आणखी संतप्त झाला. जोपर्यंत डॉ. चांदेकर यांचे इतरत्र स्थानांतर होणार नाही तोवर त्या मृत युवतीवर अंत्यसंस्कार होणार नाही अशी भूमिका जमावाने घेतली. संजय गुज्जनवार यांनी जमावाला शांत केले. डॉ. गुज्जनवार यांनी वरिष्ठ अधिकाऱ्यांशी चर्चा केली. त्यानंतर वैद्यकीय अधिकाऱ्याचे आजच स्थानांतर करण्यात येईल असे लेखी आश्वासन दिल्यानंतर त्या युवतीवर सिरोली येथे अंत्यत शोकाकुल वातावरणात अंत्यसंस्कार पार पडले. माणिक बिझलवार यांचे फिर्यादीवरून अर्जुनी/मोरगाव पोलिसांनी कलम १७४ जा.फौ. नुसार आकस्मिक मृत्यूची नोंद केली. पो.हवालदार रोशन गोंडाणे तपास करीत आहे.