ब्राह्मणकर यांचा आत्मदहनाचा इशारा

सालेकसा तालुक्यांतर्गत येणाऱ्या प्राथमिक आरोग्य केंद्र

गोंदिया : सालेकसा तालुक्यांतर्गत येणाऱ्या प्राथमिक आरोग्य केंद्र सातगावचे वैद्यकीय अधिकारी डॉ. विजय वानखेडे यांच्यावर वरिष्ठ अधिकाऱ्यांनी कोणतीही कारवाई न केल्याने कंटाळलेल्या कारूटोला येथील संतोष ब्राम्हणकर यांनी आत्मदहनाचा इशारा दिला आहे. सालेकसा तालुक्यातील कारूटोला येथील रहिवासी संतोष धनराज ब्राह्मणकर यांची पत्नी स्रेहा यांना प्रसुतीसाठी १५ एप्रिलच्या रात्री १२ वाजता सातगाव येथील प्राथमिक आरोग्य केंद्रात दाखल करण्यात आले होते. त्यावेळी आरोग्य सेविका टेंभूर्णीकर यांनी स्रेहाची तपासणी केली. मात्र वैद्यकीय अधिकारी डॉ.विजय वानखेडे हे मुख्यालयात असूनही तपासणीसाठी आले नाही. दुसऱ्या दिवशी सकाळी १० वाजता डॉ.वानखेडे यांनी तपासणी करून प्रसूती येथे सुखरूप व सुरक्षित होईल, असे आश्वासन दिले. सायंकाळी ७.३० वाजता संतोष ब्राह्मणकर डॉ. वानखेडे यांना बोलविण्यासाठी त्यांच्या क्वॉर्टरवर गेले, त्यावेळी डॉ. वानखेडे यांनी तुमची पत्नी येथे दाखल आहे. तुम्ही काळजी करू नका. तुम्ही माझ्या क्वॉर्टरमधून निघून जा. जो एमबीबीएस असेल तो तपासणी करेल. माझे काही काम नाही, असे बोलून क्वॉर्टरबाहेर हाकलून दिल्याचे ब्राम्हणकर यांचे म्हणणे आहे. यानंतर १६ एप्रिलच्या रात्री तपासणी करून गोंदियाला न्या, असे सांगितले. त्यामुळे ब्राह्मणकर आपल्या पत्नीला घेवून बाई गंगाबाई रूग्णालयात आले. रात्री साडेबारा वाजता आॅपरेशनद्वारे प्रसूती करण्यात आली. परंतु नवजात मुलगी पोटामध्येच मृत्यू पावली, असे डॉक्टरांनी सांगितले. मुलीच्या मृत्यूस व पत्नीची प्रकृती खालावण्यामागे डॉ.वानखेडे यांचे दुर्लक्ष व हलगर्जीपणा कारणीभूत असल्याचा आरोग ब्राह्मणकर यांनी केला आहे. यानंतर १६ ते २६ एप्रिलपर्यंत संतोष यांची पत्नी स्रेहा गंगाबाई रूग्णालयातच भरती होती. तरीसुद्धा प्रकृतीत सुधारणा झाली नाही. या सर्व प्रकारासाठी सातगाव येथील प्राथमिक आरोग्य केंद्राचे डॉ. विजय वानखेडे कारणीभूत आहेत. त्यांच्यामुळे मानसिक व आर्थिक त्रास सहन करावा लागला. त्यामुळे त्यांची चौकशी करून योग्य ती कारवाई करण्यात यावी व न्याय द्यावे, अशी मागणी संतोष ब्राह्मणकर यांनी केली आहे. न्याय न मिळाल्यास सपत्निक जि.प. गोंदियासमोर आमरण उपोषणावर बसू, असा इशारा त्यांनी दिला आहे. यासंबंधीचे निवेदन त्यांनी पोलीस अधीक्षक गोंदिया, गृहमंत्री आर.आर. पाटील, आरोग्य मंत्री, आरोग्य संचालक मुंबई, जिल्हाधिकारी गोंदिया, मुख्य कार्यपालन अधिकारी गोंदिया व जि.प.अध्यक्ष तसेच जिल्हा आरोग्य अधिकाऱ्यांना दिले आहे. (प्रतिनिधी)