आमगाव : पोलीस कोठडीत आरोपीच्या झालेल्या मृत्यूप्रकरणी येथील तत्कालीन पोलीस निरीक्षकांसह चार कर्मचाऱ्यांची भंडारा कारागृहात गुरुवारी रवानगी करण्यात आली. आरोपी मृत्यूप्रकरणी सीआयडी तपासातून पाच कर्मचाऱ्यांवर खुनाचा गुन्हा दाखल करण्यात आला होता.
कुंभारटोली येथील जिल्हा परिषद शाळेतील साहित्य चोरी प्रकरणात स्थानिक गुन्हे शाखेच्या पथकाने २० मे रोजी राजकुमार अभयकुमार धोती (वय ३०) यांच्यासह सुरेश धनराज राऊत, राजकुमार गोपीचंद मरकाम या तिघांना अटक केली होती. २१ मे रोजी स्थानिक गुन्हे शाखेने आरोपींना आमगाव पोलीस ठाण्याला सोपविले. त्यापैकी राजकुमार धोती याचा २२ मे रोजी सकाळी सव्वापाचच्या सुमारास पोलीस कोठडीत मृत्यू झाला. दरम्यान, या प्रकरणाचे गांभीर्य ओळखून पोलीस अधीक्षक विश्व पानसरे यांनी पोलीस निरीक्षक, सहायक पोलीस निरीक्षक व दोन पोलीस शिपाई यांना तडकाफडकी निलंबीत केले होते. त्यानंतर हे प्रकरण सीआयडीकडे सोपविण्यात आले. पोलीस कोठडीत मारहाण प्रकरणातील तपासात पोलीस निरीक्षकासह पाच कर्मचाऱ्यांवर २७ मे रात्री ८.४५ वाजता गुन्हा दाखल करण्यात आला. या प्रकरणात आरोपी पोलीस निरीक्षक सुभाष चौहान, पोलीस हवालदार खेमराज खोब्रागडे, अरुण उईके, दतात्रय कांबळे यांच्याविरोधात भादंवि कलम ३०२, ३३०, ३४ अंतर्गत गुन्हा नोंद करून अटक करण्यात आली. पोलीस उपनिरीक्षक महावीर जाधव फरार झाल्याने त्याला अटक करण्यात आली नव्हती. अखेर मंगळवारी त्यालाही अटक करण्यात आली. तथापि, गुरुवारी आरोपी पोलीस निरीक्षक सुभाष चौहान, पोलीस हवालदार खेमराज खोब्रागडे, अरुण उईके, दत्तात्रय कांबळे यांची पोलीस कोठडी संपल्याने त्यांना न्यायालयात हजर करण्यात आले. न्यायालयाने त्यांना न्यायालयीन कोठडी सुनावल्याने त्यांची भंडारा कारागृहात रवानगी करण्यात आली.