गव्याच्या हल्ल्यात होमगार्ड ठार; बेतोडा परिसरात भीतीचे सावट, नागरिकांत खळबळ

या घटनेने संपूर्ण परिसरात भीतीचे वातावरण निर्माण झाले आहे.

लोकमत न्यूज नेटवर्क, फोंडा : बेतोडा जंक्शनजवळील कन्हेवाळ येथे गवा रेड्याच्या हल्ल्यात फोंडा पोलिस स्थानकात कार्यरत असलेल्या होमगार्डचा मृत्यू झाल्याची धक्कादायक घटना बुधवारी संध्याकाळी घडली. दिनेश तुळशीदास गावडे (वय ४८, रा. उडीवाडा-उसगाव) असे मृताचे नाव असून, या घटनेने संपूर्ण परिसरात भीतीचे वातावरण निर्माण झाले आहे.

मिळालेल्या सविस्तर माहितीनुसार, फोंडा परिसरात अलीकडच्या काळात गवे रेडे दिवसाढवळ्या वावरताना दिसत असून नागरिकांकडून व्यक्त होत असलेली भीती अखेर खरी ठरली आहे. बुधवारी संध्याकाळी दिनेश गावडे हे बेतोडा येथे एका मित्राला भेटण्यासाठी गेले होते. त्यांनी आपली गाडी रस्त्याच्या कडेला उभी करून पुढे काही अंतर चालत गेल्यानंतर अचानक एका गव्याने त्यांच्यावर हल्ला चढविला. या घटनेची माहिती मिळताच फोंडा येथील इस्पितळात गावडे यांच्या नातेवाईक व मित्रांनी मोठी गर्दी केली.

फोंडा पोलिस स्थानकाचे निरीक्षक मोहन गावडे यांनीही इस्पितळात धाव घेतली. उसगाव येथील समाजकार्यकर्ते तुळशीदास प्रभू यांनी दिलेल्या माहितीनुसार, दिनेश गावडे यांच्या पश्चात पत्नी व दोन लहान मुले असा परिवार आहे. मोठी मुलगी यंदा सातवीत शिकत असून, मुलगा चौथीत आहे. दिनेश हे कुटुंबातील एकमेव कमावते सदस्य असल्याने त्यांच्या निधनाने कुटुंबावर मोठे संकट कोसळले आहे.

इस्पितळात नेत असताना दिनेश सोबत असणाऱ्या मित्रांशी बोलत होते..

गव्याची दोन्ही शिंगे दिनेश यांच्या जांघेत घुसल्याने ते गंभीर जखमी झाले. हल्ल्यानंतर गवा त्याच परिसरातच वावर करत उपस्थितांवर धावून जात होता. मात्र, लोकांनी आरडाओरड केल्यानंतर तो पळून गेला. गंभीर जखमी अवस्थेत असलेल्या दिनेश गावडे याला त्याच्या मित्रांनी तातडीने फोंडा येथील उपजिल्हा इस्पितळात दाखल केले. इस्पितळात नेण्यापूर्वी ते मित्रांशी संवाद साधत होते; मात्र उपचार सुरू असतानाच त्यांची प्रकृती अचानक खालावली आणि त्यांचा मृत्यू झाला.