गडचिराेली : गडचिराेली जिल्ह्यातील ओबीसी प्रवर्गाचे आरक्षण पूर्ववत १९ टक्के करावे, अन्यथा जिल्हाभर आंदाेलन करण्यात येईल, असा इशारा राष्ट्रीय ओबीसी युवा महासंघाने दिला.
प्रजासत्ताक दिनाचे औचित्य साधून ना. यड्रावकर जिल्हा दाैऱ्यावर आले असता, त्यांना ओबीसी समाजाच्या विविध मागण्यांचे निवेदन देण्यात आले. ओबीसी आरक्षण १९९७ ते २००२ या कालावधीत १९ टक्क्यांवरून ६ टक्क्यांवर आणल्याने ओबीसी युवा नोकरीपासून वंचित आहेत. नोकऱ्या नसल्यामुळे ओबीसी युवकांमध्ये नैराश्य आहे. महाआघाडी सरकारने ओबीसींचे आरक्षण पूर्ववत १९ टक्के करून ओबीसी समाजाला न्याय द्यावा, अन्यथा ओबीसी युवक जिल्हाभर आंदोलन करतील, असा इशारा देण्यात आला. ओबीसी समाजाची जातनिहाय जनगणना करण्यात यावी, गडचिरोली येथे ओबीसी समाजाच्या विद्यार्थ्यांकरिता स्वतंत्र वसतिगृह सुरू करण्यात यावे. ओबीसी समाजाच्या विद्यार्थ्यांची शिष्यवृत्ती लवकर द्यावी आदी मागण्यांचा समावेश निवेदनात हाेता. निवेदन देताना राष्ट्रीय ओबीसी युवा महासंघाचे जिल्हाध्यक्ष राहुल मुनघाटे, जिल्हा महासचिव राहुल भांडेकर, जिल्हा सचिव आशिष रोहणकर, तालुकाध्यक्ष तुषार बोरकुटे, कुमोद बोरकुटे, सचिन सोनटक्के, हर्षद वैरागडे उपस्थित होते.