ग्रंथ महोत्सवातून होणार उत्कृष्ट कलाविष्कार

शिक्षण विभाग जिल्हा परिषद व माहिती तथा जनसंपर्क महासंचालनालयाच्यावतीने २ ते ७ जानेवारीदरम्यान गडचिरोलीत आयोजित करण्यात आलेल्या ग्रंथ महोत्सवातून विविध प्रकारचा

गडचिरोली : शिक्षण विभाग जिल्हा परिषद व माहिती तथा जनसंपर्क महासंचालनालयाच्यावतीने २ ते ७ जानेवारीदरम्यान गडचिरोलीत आयोजित करण्यात आलेल्या ग्रंथ महोत्सवातून विविध प्रकारचा उत्कृष्ट कलाविष्कार होणार आहे, अशी माहिती प्राथमिक तथा माध्यमिक शिक्षणाधिकारी उल्हास नरड यांनी शनिवारला आयोजित पत्रकार परिषदेत दिली.
ग्रंथ महोत्सवाच्या पहिल्या दिवशी ५ जानेवारीला सकाळी ८ वाजता शहरातील सर्व शाळा, महाविद्यालयाचा सहभाग असलेली भव्य ग्रंथदींडी काढण्यात येणार आहे. त्यानंतर शिवाजी महाविद्यालयाच्या प्रांगणातील संत ज्ञानेश्वर नगरीत जिल्ह्याचे पालकमंत्री तथा राज्याचे आदिवासी विकास राज्यमंत्री अम्ब्रीशराव आत्राम यांच्या हस्ते उद्घाटन होईल. कार्यक्रमाच्या अध्यक्षस्थानी जि.प. अध्यक्ष परशुराम कुत्तरमारे राहतील. प्रमुख अतिथी म्हणून खासदार अशोक नेते, आमदार ना. गो. गाणार, मितेश भांगडिया, प्रा. अनिल सोले, डॉ. देवराव होळी, कृष्णा गजबे, जिल्हाधिकारी रणजितकुमार, मुख्य कार्यकारी अधिकारी संपदा मेहता आदी मान्यवर उपस्थित राहतील.
याच दिवशी दुपारी १ ते ३ यावेळेत टीव्ही स्टार मिर्झा बेग यांचा कॉमेडी एक्सप्रेस हा विनोदी कार्यक्रम होणार आहे, अशीही माहिती शिक्षणाधिकारी नरड यांनी दिली. याच दिवशी कवी संमेलन व सायंकाळच्या सुमारास सांस्कृतिक कार्यक्रम होणार आहेत. ६ जानेवारीला परिसंवाद, ७ जानेवारीला शिक्षकांसाठी प्रश्नमंजुषा कार्यक्रम होणार आहे. (स्थानिक प्रतिनिधी)