गडचिरोली : शासकीय दवाखान्याच्या फायर ऑडिटसाठी लागणारा निधी कमी पडू देणार नाही. फायर ऑडिटचे काम तात्काळ करावे, असे प्रतिपादन राज्याचे सार्वजनिक आरोग्य, राज्यमंत्री राजेंद्र पाटील यड्रावकर यांनी केले. गडचिरोली येथे आरोग्यविषयक सुविधांचा आढावा घेण्यासाठी आले होते.
भंडारा येथील घटनेसारखी दुर्दैवी घटना दुसऱ्या रुग्णालयात घडू नये यासाठी प्रशासनाने सतर्क असले पाहिजे. त्यासाठी आवश्यक उपाययाेजना कराव्यात. रुग्णालयांमध्ये सुविधा पुरविण्यासाठी शासन निधी कमी पडू देणार नाही. जिल्ह्याचे पालकमंत्री एकनाथ शिंदे यांच्या आध्यक्षतेखाली मुंबई येथे बैठक घेऊन गडचिराेली जिल्ह्यातील आरोग्य सुविधांबाबत असणाऱ्या मागण्यांबाबत चर्चा करू, असे आश्वासन दिले. कोरोना परिस्थिती, मलेरिया साथ, रिक्त पदे, इतर अडीअडचणी त्यांनी यावेळी जाणून घेतल्या. राज्य शासनाने नुकताच रिक्त पदांपैकी ५० टक्के जागा भरा असा आदेश दिला आहे. त्यानुसार गडचिरोली जिल्ह्यातसुद्धा पदभरती वेळेत होईल. आरक्षण हा मुद्दा राज्यभर सध्या सुरू आहे. त्यावरही लवकरच तोडगा निघेल असे त्यांनी सांगितले.
यावेळी जिल्हा शल्य चिकित्सक अनिल रुडे, जिल्हा आरोग्य अधिकारी डॉ. शशिकांत शंभरकर, अतिरिक्त जिल्हा शल्य चिकित्सक डॉ. सतीश सोलंके, अतिरिक्त जिल्हा आरोग्य अधिकारी डॉ. सुनील मडावी, निवासी वैद्यकीय अधिकारी डाॅ. बागराज धुर्वे, डाॅ. माधुरी किलनाके, डॉ. विनोद म्हशाखेत्री, अधिसेविका नंदा मेश्राम, सहायक अधिसेविका शंकर ताेगरे आदी हजर हाेते. यावेळी ३५ वर्षांची सेवा केलेल्या व नुकत्याच सेवानिवृत्त झालेल्या अधिसेविका शालिनी कुमरे यांचा राज्यमंत्र्यांच्या हस्ते सत्कार करण्यात आला. उत्कृष्ट परिचारिका राष्ट्रपती पुरस्कारासाठी त्यांचे नामांकन करण्यात आले आहे.
बाॅक्स ........
अतिदक्षता विभागातील सुविधांची प्रशंसा
राज्यातील लीलावती, ब्रिच कँडी या सुप्रसिद्ध रूग्णालयाप्रमाणे गडचिराेली जिल्हा रुग्णालयातील अतिदक्षता विभाग तयार करण्यात आला आहे. लाईट, ऑक्सिजन व इतर व्यवस्था अतिशय उत्तम आहे, असे गाैरवाेद्गार राज्यमंत्री यड्रावकर यांनी केले. नव्याने स्थापन झालेल्या आरटीपीसीआर लॅबची पाहणी केली.