प्रजनन व बालआरोग्य कार्यक्रमासाठी जिल्ह्याचा सन्मान

सार्वजनिक आरोग्य विभाग महाराष्ट्र शासन यांच्या वतीने प्रजनन व बाल आरोग्य कार्यक्रमासाठी ,,,,

चार वैद्यकीय अधिकारी : कुरखेडा रुग्णालयाचे रक्त संक्रमण केंद्र सन्मानित
गडचिरोली : सार्वजनिक आरोग्य विभाग महाराष्ट्र शासन यांच्या वतीने प्रजनन व बाल आरोग्य कार्यक्रमासाठी गडचिरोली जिल्ह्यातील वैद्यकीय अधिकाऱ्यांनी केलेल्या उल्लेखनीय कामाबद्दल त्यांचा पुणे येथे मंगळवारी सत्कार करण्यात आला.
गडचिरोली जिल्ह्यातून उपजिल्हा रुग्णालय कुरखेडाचे वैद्यकीय अधिकारी डॉ. नंदकुमार माळाकोळीकर, आरमोरी उपजिल्हा रुग्णालयाच्या वैद्यकीय अधिकारी डॉ. छाया उईके, कुरखेडा उपजिल्हा रुग्णालयाचे वैद्यकीय अधिकारी डॉ. एस. व्ही. ठाकर, आरमोरीचे वैद्यकीय अधिकारी डॉ. यादव मोरे यांचा सत्कार करण्यात आला. तर रक्त संक्रमणाच्या कामात उत्कृष्ट कार्य करणारे रक्त साठवण केंद्र म्हणून उपजिल्हा रुग्णालय कुरखेडा केंद्राचाही या कार्यक्रमात विशेष गौरव करण्यात आला. डॉ. नंदकुमार माळाकोळीकर यांनी सन २०१४-१५ या वर्षात ३७४ सिझेरियन शस्त्रक्रिया, ११५० प्रसूती शस्त्रक्रिया केल्या आहेत. महाराष्ट्रातील प्रशिक्षित प्रसूतीशास्त्र तज्ज्ञ यांच्या कामातील हे सर्वात उत्कृष्ट काम राज्यात ठरले आहे. २०१२ मध्ये जिल्हा सामान्य रुग्णालय गडचिरोली यांच्यातर्फे डॉ. माळाकोळीकर यांचा याच उल्लेखनीय कार्यासाठी सन्मान करण्यात आला होता. डॉ. नंदकुमार माळाकोळीकर यांचा राज्य कुटुंब कल्याण कार्यक्रम पुणेच्या अतिरिक्त संचालक डॉ. अर्चना पाटील, आरोग्य विभागाचे संचालक डॉ. सतिश पवार, राष्ट्रीय आरोग्य अभियान मुंबईच्या संचालक आय. ए. कुंदन, आरोग्य विभागाच्या प्रधान सचिव सुजाता सौनिक यांच्या उपस्थितीत गौरव करण्यात आला.
गडचिरोली या दुर्गम व अतिदुर्गम जिल्ह्यात राज्य सरकारच्या आरोग्य सेवेवरच सर्वाधिक भार आहे. विशेषत: महिलांच्या प्रसूतीविषयक तसेच नवजात बालकांचा जन्म-मृत्यू दर वाढविण्याच्या कामात वैद्यकीय सेवेत चार अधिकाऱ्यांनी उल्लेखनीय काम केले आहे. महिलांच्या संस्थात्मक प्रसूती वाढविण्याच्या कामातही या वैद्यकीय अधिकाऱ्यांची मोलाची भूमिका राहिली आहे. (जिल्हा प्रतिनिधी)