------
या मोहिमेत पहिल्या दिवशी लसीकरणासाठी जिल्हा व आरोग्य प्रशासनाने जय्यत तयारी केली होती. जिल्ह्यातील चार लसीकरण केंद्रांवर प्रतिदिन १०० प्रमाणे दरदिवशी ४०० आरोग्य कर्मचाऱ्यांना लस देण्याचे नियोजन करण्यात आले आहे. मुख्यमंत्री उद्धव ठाकरे यांनी व्हिडिओ कॉन्फरन्सद्वारे लसीकरणासाठी आरोग्य कर्मचाऱ्यांचे अभिनंदन करून लसीकरणाचा प्रारंभ केला. जिल्हा सामान्य रुग्णालय गडचिरोली येथील लसीकरण केंद्राला मुख्य कार्यकारी अधिकारी कुमार आशीर्वाद यांनी भेट दिली व केंद्राची पाहणी करून तेथील व्यवस्थेची पाहणी केली. तसेच आरोग्य कर्मचाऱ्यांना आवश्यक ते निर्देश दिले.
लसीकरणाच्या प्रारंभप्रसंगी मुख्य कार्यकारी अधिकारी कुमार आशीर्वाद, प्रभारी जिल्हाधिकारी अनंत वालस्कर, जिल्हा शल्य चिकित्सक डॉ. अनिल रुडे, जिल्हा आरोग्य अधिकारी डॉ. शशिकांत शंभरकर, अतिरिक्त जिल्हा शल्य चिकित्सक डॉ. सतीश सोलंके व इतर अधिकारी तथा कर्मचारी उपस्थित होते.
जिल्हा सामान्य रुग्णालय येथील लसीकरण केंद्रावर जिल्हास्तरीय लसीकरणाचा प्रारंभ सकाळी १०.३० वाजता करण्यात आला. मान्यवरांच्या उपस्थितीत परिचारिका सारिका दुधे यांना कोविशिल्डची पहिली लस देण्यात आली. लसीकरण केंद्रावर केंद्र शासनाच्या सूचनेनुसार सर्व सुविधा उपलब्ध करून देण्यात आल्या होत्या. कोविड-१९ ची लस घेण्यासाठी जिल्ह्यातील डॉक्टर व आरोग्य कर्मचाऱ्यांनी सकाळपासूनच केंद्रात हजेरी लावली होती. लसीबद्दल त्यांच्यात उत्सुकता आणि उत्साह दिसून येत होता. अनेक दिवसांच्या प्रतीक्षेनंतर लस घेण्यासाठीची उत्सुकता शिगेला पोहोचली होती. लस घेताना डॉक्टरांचा उत्साह व प्रतिसाद वाखाणण्याजोगा होता.
लस घेतल्यानंतर डॉक्टरांनी अतिशय सकारात्मक प्रतिक्रिया व्यक्त केल्या. मनात कुठलीही शंका न ठेवता नागरिकांनी येत्या काळात लसीकरण करून घ्यावे, असे आवाहन त्यांनी केले. जगातील सर्वांत मोठ्या लसीकरण मोहिमेत सहभागी होऊन लस घेतल्याचा उत्साह त्यांच्या चेहऱ्यावरून ओसंडून वाहत होता.
लस देण्यात येणाऱ्या लाभार्थ्यांना त्यांच्या मोबाईल नंबरवर मेसेज देण्यात आले होते. लाभार्थी केंद्रावर आल्यानंतर त्यांना प्रतीक्षा कक्षात बसवून समुपदेशन करण्यात आले. त्यानंतर लाभार्थींना लसीकरण कक्षात नेऊन प्रत्यक्ष लस देण्यात आली. लसीकरण कक्षात त्यांना लस घेतल्यानंतरही कोरोना आजारापासून सुरक्षित राहण्याच्या पद्धती, जसे मास्क लावणे, वारंवार हात धुणे आणि सहा फुटांचे सुरक्षित अंतर ठेवणे बंधनकारक असल्याच्या सूचना देण्यात आल्या. लसीकरणानंतर काही त्रास जाणवल्यास आपल्या एएनएम-आशा कार्यकर्ती, जवळचे आरोग्य केंद्र किंवा कंट्रोलरूमशी संपर्क साधावा, असे सांगण्यात आले. पुढील डोसची तारीख, वेळ आणि ठिकाण मोबाईलवर एसएमएसद्वारे कळविण्यात येईल, असे चार संदेश समजावून सांगून लसीकरण करण्यात आले.
लसीकरणानंतर लाभार्थ्यास अर्धा तास निरीक्षण कक्षात तज्ज्ञ डॉक्टरांच्या निरीक्षणात ठेवण्यात येऊन व प्रक्रिया पूर्ण झाल्यानंतर लाभार्थ्यांना घरी जाण्यास सांगितले.
विविध कक्षांची उभारणी
जिल्ह्यातील गडचिरोली, अहेरी, चामोर्शी आणि आरमोरी या चार लसीकरण केंद्रांवर कोविड लसीकरणाचा प्रारंभ करण्यात आला. कुरखेडा येथील पाचवे लसीकरण केंद्र तूर्त रद्द करण्यात आले. लसीकरणाची सर्व तयारी आरोग्य विभागाने केली होती. केंद्राच्या ठिकाणी प्रतीक्षा कक्ष, लसीकरण कक्ष व निरीक्षण कक्ष उभारण्यात आले होते. पहिल्या टप्प्यात आरोग्य सेवा देणाऱ्यांना लस देण्यात आली. यासाठी लाभार्थ्यांची यादी यापूर्वीच कोविन ॲपवर अपलोड करण्यात आली होती.
२८ दिवसांनंतर मिळणार दुसरा डोस
कोविशिल्ड ही लस लाभार्थ्यांना स्नायूमध्ये ०.५ मिली द्यावयाची असून, एका व्हायलमध्ये १० लाभार्थी लाभ घेणार आहेत. सध्या नोंदणी केलेल्या ९९६६ आरोग्य कर्मचाऱ्यांना ही लस दिली जाणार आहे. आठवड्याचे चार दिवस हे लसीकरण चारही केंद्रांवर सुरू राहील. याच लाभार्थ्यांना २८ दिवसांनंतर दुसरा डोस घ्यावयाचा आहे. कोविशिल्ड लसीचे दोन डोस घेतल्यानंतर पुढच्या १४ दिवसांनंतर लस घेणाऱ्याच्या शरीरात अँटिबॉडी तयार व्हायला सुरुवात होईल. कोरोनाची लस घेतल्यानंतरही मास्क वापरणे, हात स्वच्छ धुणे व सुरक्षित अंतर राखणे आवश्यक असल्याची सूचना यावेळी लस घेणाऱ्या लाभार्थ्यांना देण्यात आली.