अल्पवयीन मुलीवर छत्तीसगडी युवकांचा सामूहिक बलात्कार

पोलिसांनी दिलेल्या माहितीनुसार, धानोरा तालुक्यातील एका गावात एका कार्यक्रमाकरिता हे चार युवक आले होते. त्याच कार्यक्रमात सदर अल्पवयीन मुलगीही गेली होती. त्या चार युवकांनी सदर युवतीला कार्यक्रमातून गावालगतच्या जंगलात नेले. एका युवकाने तिला पकडून ठेवून तिघांनी आळीपाळीने बलात्कार केला. यानंतर तेथून पोबारा केला.

दुसऱ्या दिवशी मुलीच्या पालकांना याबाबत कळताच त्यांनी पोलीस ठाण्यात फिर्याद दाखल केली. पोलिसांनी छत्तीसगडमध्ये जाऊन त्या चारही युवकांना १ जून रोजी त्यांच्या गावातून ताब्यात घेतले. गडचिरोली येथील सत्र न्यायालयाने चारही आरोपींना सात दिवसांचा पीसीआर दिला. सदर मुलीवर गडचिरोली येथील रुग्णालयात उपचार सुरू आहेत. अधिक तपास पोलीस निरीक्षक विवेक अहिरे यांच्या मार्गदर्शनात सहायक पोलीस निरीक्षक अंजली राजपूत करीत आहेत.

(बॉक्स)

पोलिसांकडून माहिती देण्यास टाळाटाळ

या घटनेबाबत धानोरा पोलिसांना माहिती विचारली असता त्यांनी टाळाटाळ केली. या घटनेबाबत माहिती छापाल तर तुमच्यावरच गुन्हा दाखल होईल, असे सांगत त्यांनी पत्रकारांपासून ही माहिती लवपून ठेवण्याचा प्रयत्न केला. पोलिसांच्या या भूमिकेमुळे आश्चर्य व्यक्त केले जात आहे.