७९ हजार रूपयांची दारू जप्त

पोलीस अधीक्षक कार्यालयाच्या दारूबंदी पथकाने गडचिरोली शहरातील दोन वॉर्डात गुरूवारी तसेच आरमोरी पोलिसांनी तालुका मुख्यालयालगतच्या रामाळा येथे ....

दारूबंदी पथकाची कारवाई : गडचिरोली व आरमोरीत पोलिसांची धाड; मुद्देमालाचा समावेश
गडचिरोली/आरमोरी : पोलीस अधीक्षक कार्यालयाच्या दारूबंदी पथकाने गडचिरोली शहरातील दोन वॉर्डात गुरूवारी तसेच आरमोरी पोलिसांनी तालुका मुख्यालयालगतच्या रामाळा येथे बुधवारी तीन हातभट्ट्यांवर धाड टाकून मोहफुलाची दारू जप्त केली. दोन्ही ठिकाणाहून ७९ हजार २५० रूपयांचा मुद्देमाल जप्त करण्यात आला.
गडचिरोली शहरातील रामपुरी वॉर्डात अवैधरित्या दारूविक्री केली जात असल्याची माहिती पथकाला मिळताच धाड टाकून १८० मिली ३ हजार ८०० रूपये किमतीच्या ३८ निपा, ९० मिली तीन हजार रूपये किमतीच्या ६० निपा अशी एकूण ६ हजार ८०० रूपयांची देशी दारू जप्त केली. रामपुरी वॉर्डातील रवींद्र टेकाम, महेश टेकाम हे अवैधरित्या देशी दारूची विक्री करीत होते. पोलिसांनी पंचासमक्ष दारू पकडून आरोपींना दारूसह ताब्यात घेतले. तसेच शहरातील नेहरू वॉर्डात कृष्णा सीताराम बिंदे, शकुंतला मेश्राम हे अवैधरित्या दारूविक्री करीत असल्याची माहिती मिळताच पोलिसांनी धाड टाकून देशी दारू व दुचाकी असा एकूण ५७ हजार ४५० रूपयांचा मुद्देमाल जप्त केला. आरोपी कृष्णा बिंदे, शकुंतला मेश्राम यांच्या विरोधात गुन्हा नोंदविला आहे. सदर कारवाई पोलीस हवालदार शंकर डांगे, मिर्गे, बाला, राठोड, ढवळे, दुधलकर, दुग्गा, तायडे यांनी केली.
आरमोरीनजीकच्या रामाळा येथे तीन ठिकाणी हातभट्टी लावून मोहफुलाची दारू काढली जात असल्याच्या माहितीवरून पोलिसांनी बुधवारी घटनास्थळी धाड टाकून १५ हजार रूपयांची दारू जप्त केली. त्याबरोबरच संगीता हरिचंद्र राऊत, वनिता दामोदर शेंद्रे, इंदू अजय नेवारे सर्व रा. रामाळा यांना अटक केली आहे. रामाळा-ठाणेगाव मार्गावरील लगतच्या झुडूपात आरोपी हातभट्टी लावून मोहाची दारू काढून त्याची विक्री करीत होते. बुधवारी पोलिसांनी घटनास्थळ गाठून संगीता राऊत यांच्याकडून ४० लिटर मोहफूल दारू व ५० किलो मोहफूल असा एकूण ६ हजार ५०० रूपयांचा माल वनिता दामोदर शेंद्रे यांच्याकडून ३० लिटर मोहफूल दारू व ४० किलो मोहफुलाचा सडवा, असा एकूण ४ हजार ७०० रूपयांचा मुद्देमाल तसेच आरोपी इंदू नेवारे यांच्याकडून ३० लिटर मोहफुलाच्या दारूसह ४० किलो सडवा असा एकूण ४ हजार ७०० रूपयांचा मुद्देमाल जप्त केला. तिन्ही ठिकाणाहून १५ हजार रूपयांचा मुद्देमाल जप्त करण्यात आला. आरोपींवर दारूबंदी कायदा ६५ (ई) (क) अन्वये गुन्हा नोंदविण्यात आला आहे. सदर कारवाई प्रभारी ठाणेदार बच्छलवार, उंदीरवाडे, गोकुल मेश्राम, कन्नाके, म्हशाखेत्री यांनी केली.