वर्षभरापासून कोरोना महामारीने थैमान घातले आहे. त्यामुळे सर्वच व्यवहार ठप्प झाले आहेत. जीवनमरणाचा खेळ सुरू आहे. शाळा, कॉलेज सर्व बद झाले आहे. मधल्या काळात विद्यार्थ्यांना मोबाईलद्वारे शिक्षणाचे धडे मिळत होते; परंतु ग्रामीण भागातील गोरगरीब मुलांकडे महागडे मोबाईल नसल्यामुळे अनेक विद्यार्थी शिक्षणापासून वंचित राहिले. त्यामुळे अभ्यासाचा ताण कमी झाला आहे. शाळा बंद, अभ्यास बंद असल्यामुळे मुलांपुढे टीव्ही पाहणे किवा खेळण्याशिवाय पर्याय नाही. त्यामुळे मुलांचे शैक्षणिक नुकसान होऊन अभ्यासावरचे लक्ष विचलित होत आहे. गेल्या वर्षभरापासून शाळा बंद असल्यामुळे शाळेचे पटांगण मुलांसाठी खेळण्याचे ठिकाण झाले आहे. अभ्यास नसल्यामुळे वडजाई येथील जिल्हा परिषदेच्या शाळेच्या पटांगणात गोट्या-गोट्यांचा डाव रंगत आहे. हा डाव पाहून मोठी मंडळीही हाैस भागवून घेत आहेत.
कालबाह्य झालेले जुने खेळ कोरोनामुळे खेळताना लहान विद्यार्थी दिसून येत आहेत. लहान मुलांमध्ये सर्वांत प्रिय असलेला विटीदांडू, गोट्या-गोट्या, लगोरी, कबड्डी, आदी खेळ खेळले जात आहेत.
कालबाह्य झालेले खेळ खेळले जात असल्याने ज्येष्ठ नागरिकांसह तरुणांना त्यांचे विशेष आकर्षण आहे. ज्येष्ठ नागरिकांना त्यांचे बालपणाचे दिवस आठवू लागले आहेत. मुलांचे शाळा आणि अभ्यासाकडे दुर्लक्ष होत असले तरी या बिकट प्रसंगात ते तरी काय करणार, असा प्रश्न आहे. पालकांना मुलांच्या अभ्यासाची चिंता असली तरी हे त्यांचे खेळण्याचे वय आहे.