धुळे : जिल्ह्यात कोरोनाचा संसर्ग वाढला असून, आठवडाभरापासून तीन आकडी रुग्णसंख्या आहे. त्या तुलनेत सॅनिटायझरची मागणी मात्र घटली आहे. गेल्या वर्षी ८५ ते ९० टक्क्यांवर असलेली विक्री आता मात्र २५ टक्क्यांपर्यंत खाली आली आहे.
एकीकडे कोरोना रुग्णांची संख्या वाढत असताना सॅनिटायझरचा वापर मात्र खूप कमी झाला आहे. गेल्या वेळी कोरोना हा आजार सर्वांसाठी नवीन असल्याने सॅनिटायझरने हात स्वच्छ केले तरच आपण सुरक्षित राहू, अशी समजूत सर्वसामान्यांची झाली होती. त्यामुळे घरातदेखील सॅनिटायझरचा वापर झाला. परंतु, वर्षभरात झालेल्या जाहिरातींमुळे आणि जनजागृतीमुळे हात स्वच्छ करण्यासाठी साबणाचा वापर वाढला. त्यामुळे सॅनिटायझरला मागणी घटली आहे.
कामानिमित्त बाहेर फिरणारे सर्वच जण सॅनिटायझरचा वापर करताना दिसत नाहीत. काहींना सॅनिटायझर आर्थिकदृष्ट्या परवडत नाही, तर काहींनी कोरोनाला गांभीर्याने घेणे बंद केले आहे. बेफिकिरी वाढली आहे. त्यामुळे देखील विक्री कमी झाली.
७५ टक्के विक्री घटली
गेल्या वर्षी कोरोनाचा संसर्ग सुरू झाला त्यावेळी सॅनिटायझरला मोठ्या प्रमाणात मागणी होती. आता ती २५ टक्क्यांवर आली आहे. तब्बल ७५ टक्के विक्री घटली आहे.
गेल्या वेळी घराघरांत सॅनिटायझरचा वापर वाढला होता. परंतु, साबणाने हात स्वच्छ करता येतात अशी जनजागृती झाली. त्यामुळेदेखील सॅनिटायझरला मागणी घटली आहे.
मेडिकल दुकानातच नव्हे, तर इतर व्यावसायिकांनीदेखील सॅनिटायझरची लहान दुकाने रस्त्यावर सुरू केली होती. यंदा मात्र त्यांचा व्यवसाय ठप्प झाल्यासारखा आहे.
दिवाळीपासून कोरोनाचा संसर्ग कमी झाला होता. त्यामुळे नागरिकांमध्ये बेफिकिरी वाढली आहे. काळजी घेणे टाळले जात आहे. त्यामुळेदेखील सॅनिटायझरची मागणी घटली.
साबणानेदेखील हात स्वच्छ होतात अशी जनजागृती झाली. बेफिकिरी वाढली. काहींना पैशांची अडचण आहे. नियमित वापरामुळे त्वचेवर परिणाम होतो असे काहींना वाटते. त्यामुळे सॅनिटायझरची विक्री केवळ २५ टक्क्यांवर आली आहे.
- विजय चाैधरी, अध्यक्ष, केमिस्ट ॲण्ड ड्रगिस्ट असोसिएशन
कोरोना विषाणूपासून बचाव करण्यासाठी वेळोवेळी साबणाने हात स्वच्छ करतो. सॅनिटायझरचा वापर आता फारसा करीत नाही.
- राजेंद्र पाटील,
साक्री रोड, धुळे
घरात राहणारे सर्वजण साबणाने हात स्वच्छ करतात. मी देखील साबणाचा वापर करतो. परंतु, बाहेर गेल्यावर मात्र सॅनिटायझरचा वापर करतो.
- डॉ. इंद्रजित गंभिरे,
तालुका वैद्यकीय अधिकारी