सुरतगाव ते काटी या १५ किमी अंतराच्या रस्त्याच्या रूंदीकरणाचे ठेकेदारामार्फत काम सध्या सुरू आहे. यासाठी ऐन पावसाळ्याच्या तोंडावर काटी ते सावरगाव या सात किमी मार्गाच्या दोन्ही बाजूच्या साईडपट्ट्या खोदून ठेवण्यात आल्या आहेत. त्या भरण्यासाठी मुरूमाचा वापर केला असून, हा मुरूम निकृष्ट दर्जाचा असल्याची तक्रार सावरगाव येथील शिवसेना कार्यकर्ते चंद्रोदन माळी यांनी जिल्हाधिकारी, खासदार यांच्याकडे केली आहे. शिवाय, पुलाच्या कामात वापरण्यात येणार सिमेंट पाईप हे आयएसआय मार्क विरहित असून, बांधकामासाठी दगडाच्या डस्टचा वापर केला जात असल्याच्याही ग्रामस्थांच्या तक्रारी आहेत.
दरम्यान, या कामासाठी कोट्यवधीचा खर्च केला जात असतानाही प्रशासनाकडून कामाचा दर्जा तपासला जात नसल्याने ग्रामस्थांत संताप व्यक्त होत आहे. सध्या दोन्ही बाजूने रस्ता खोदल्याने उपलब्ध डांबरी रोडवर काळी माती पसरली असून, यामुळे रस्ता चिखलमय झाला आहे. परिणामी १० फूट रोडवरून दुहेरी वाहतूक करताना अडचण निर्माण होत आहे. दुचाकी वाहने घसरगुंडी झाल्याने अपघाताची शक्यता नाकारता येत नाही.