पश्चिम बंगालची राजधानी कोलकाता येथील गरफा परिसरात एका घरात ३५ वर्षीय युवतीचा मृतदेह आढळला आहे. लिव्ह इन् पार्टनरसोबत ही युवती इथं राहत असल्याचं समोर आले. मधुरिमा रॉय असं या मृत युवतीचं नाव असून तिचा मृत्यू कसा झाला हे अद्याप कोडं आहे. ही युवती या फ्लॅटमध्ये लिव्ह इन पार्टनर विकास दत्तासोबत राहत होती. कालीपूजेच्या रात्री विकासच्या फ्लॅटमध्ये पार्टी झाली. दुसऱ्या दिवशी सकाळी युवतीची तब्येत खराब झाली होती. त्यानंतर तिचा मृतदेह त्याच फ्लॅटमध्ये सापडला.
या युवतीची हत्या झाली की तिने आत्महत्या केली याबाबत स्पष्टता नाही. पोलीस या घटनेचा तपास करत आहेत. या प्रकरणी एकाला ताब्यात घेण्यात आले आहे. युवतीसोबत लिव्ह इनमध्ये राहणाऱ्या विकासने म्हटलं की, मी माझ्या आजारी आईसोबत हॉस्पिटलला गेलो होतो. जेव्हा मी परत आलो तेव्हा मधुरिमा गंभीर अवस्थेत खाली पडलेली होती असं त्याने सांगितले. याच फ्लॅटच्या बाजूला असलेल्या रुममध्ये विकास दत्ताची आई राहते.
शुक्रवारी रात्री गरफा परिसरात पोलिसांनी एका फ्लॅटमधून युवतीचा मृतदेह ताब्यात घेतला. दुपारपासून ही युवती घरात एकटीच होती. जेव्हा विकास दुपारी त्याच्या आईला घेऊन डॉक्टरांकडे गेला तेव्हा युवती तिच्या खोलीत झोपलेली होती. ती झोपल्याने विकासने तिला जाग न करता बाहेर गेला. परंतु संध्याकाळी जेव्हा तो घरी परत आला तेव्हा तिची अवस्था गंभीर होती. त्यानंतर विकासने तातडीने युवतीच्या आईसह नातेवाईकांना संपर्क केला. त्यानंतर १०० नंबरवरून पोलिसांना सूचना केली. पोलीस घटनास्थळी पोहचले त्यानंतर युवतीला जवळच्या रुग्णालयात दाखल केले तिथे डॉक्टरांनी युवतीला मृत घोषित केले.
दरम्यान, युवतीचं मृत्यूचं कारण समोर आले नाही. जेव्हा पोलिसांनी तिचा मृतदेह ताब्यात घेतला तेव्हा अर्धनग्न अवस्थेत होती असं स्थानिकांनी सांगितले. पोस्टमोर्टम रिपोर्टनंतर युवतीच्या मृत्यूचं कारण स्पष्ट होईल. कालीपूजेच्या रात्री विकास आणि मधुरिमासह अन्य लोकही होते. त्यांनी खूप दारू प्यायल्याचे स्थानिकांनी सांगितले. खोलीच्या बाहेर दारूच्या बाटल्या, सिगरेट पॅकेट पडलेले होते. मधुरिमा जवळपास २ वर्षापासून विकाससह रिलेशनशिपमध्ये राहत होती.