चालत्या ट्रेनमध्ये बलात्कार पीडित तरुणीची आत्महत्या; CCTV मध्ये कैद झाली २१ मिनिटं

Rape Victim committed Suicide : तरुणी २१ मिनिटे सुरतमध्ये असल्याचे तपासात समोर आले आहे. तिला नवसारीला जायचे होते, पण वलसाडमध्ये रेल्वेत त्याचा मृतदेह सापडला.

गुजरात क्वीन ट्रेनमध्ये १९ वर्षीय तरुणीने गळफास लावून आत्महत्या केल्याप्रकरणी अहमदाबाद क्राइम ब्रँच सुरतमध्ये पोहोचली आहे. ही टीम एक दिवस सुरतमध्ये राहून या प्रकरणाशी संबंधित पुरावे गोळा करणार आहे. सुरत रेल्वे स्टेशनच्या सीसीटीव्ही फुटेजमध्ये मुलगी चालताना दिसत आहे. तरुणी २१ मिनिटे सुरतमध्ये असल्याचे तपासात समोर आले आहे. तिला नवसारीला जायचे होते, पण वलसाडमध्ये रेल्वेत त्याचा मृतदेह सापडला.

भावाचा मोबाईल घेऊन ती घराबाहेर पडली आणि एका शिक्षिकेला भेटायला जात असल्याचे सांगितले. ती बसने सुरतला आली होती. बस डेपोपासून रेल्वे स्टेशनपर्यंत सुमारे २१ मिनिटे ती सीसीटीव्ही कॅमेऱ्यात दिसत होती. बसस्थानक आणि रेल्वे स्थानकाजवळील हॉटेल्समध्ये गुन्हे शाखा तपास करणार आहे. या प्रकरणात, वडोदरा शहर पोलीस, अहमदाबाद शहर गुन्हे शाखा, न्यायवैद्यक विज्ञान प्रयोगशाळा आणि रेल्वे पोलिसांसह २५ पथके कार्यरत आहेत. सुमारे ४५० सीसीटीव्ही फुटेज पाहण्यात आले आहेत.

गुजरातच्या क्वीन ट्रेनमध्ये गळफास 

नवसारी येथील १९ वर्षीय तरुणी एका सामाजिक सेवा संस्थेत काम करत होती. पोलीस सूत्रांनी दिलेल्या माहितीनुसार, ही तरुणी नवसारी येथील भक्तीनगर येथील जलाराम बापा मंदिराजवळ राहात असून ती वडोदरा येथील महाविद्यालयात प्रथम वर्षात शिकत होती. ती वडोदरा येथून नवसारी येथील आपल्या घरी जात असताना तिने आईला कामासाठी मरोली येथे जात असल्याचे सांगितले. १० नोव्हेंबर रोजी गुजरात क्वीन ट्रेनच्या डी-12 कोचमध्ये तिचा मृतदेह दुपट्ट्याला लटकलेल्या अवस्थेत सापडला होता. पीडितेने तिच्या डायरीत वडोदरा येथे एका ऑटो-रिक्षातून दोन पुरुषांनी डोळ्यावर पट्टी बांधून एका निर्जन ठिकाणी नेल्याचा उल्लेख केला आहे. पोलीस सामूहिक बलात्काराच्या अँगलने तपास करत आहेत.