Jalgaon Gharkul scam: Suresh Jain granted temporary bail by High Court | जळगाव घरकुल घोटाळा : सुरेश जैन यांना हायकोर्टाने मंजूर केला तात्पुरता जामीन 
जळगाव घरकुल घोटाळा : सुरेश जैन यांना हायकोर्टाने मंजूर केला तात्पुरता जामीन 

ठळक मुद्दे वैद्यकीय कारणांकरिता तीन महिन्यांसाठी हंगामी जामीन आणि  पाच लाख रुपयांच्या जातमुचलक्यावर तात्पुरती सुटका करण्यात आली आहे. सप्टेंबर महिन्यात सुरेश जैन यांनी कोर्टाने ठोठावलेल्या शिक्षेला मुंबई हायकोर्टात आव्हान देत याचिका दाखल केली होती. 

मुंबई - जळगावमधील घरकुल घोटाळा प्रकरणात शिक्षा झालेले माजी मंत्री सुरेश जैन यांना मुंबई हायकोर्टाकडून अंतरिम दिलासा देण्यात आला आहे. वैद्यकीय कारणांकरिता तीन महिन्यांसाठी हंगामी जामीन आणि  पाच लाख रुपयांच्या जातमुचलक्यावर तात्पुरती सुटका करण्यात आली आहे. त्यामुळे जळगाव घरकूल घोटाळ्याप्रकरणी कारागृहात असणारे माजी मंत्री यांना हायकोर्टाकडून तूर्तास दिलासा मिळाला आहे. 

राज्यभरात गाजलेला जळगाव घरकुल घोटाळ्याप्रकरणी माजी मंत्री सुरेश जैन आणि गुलाबराव देवकर यांना धुळे न्यायालयाने शिक्षा सुनावली आहे. माजी मंत्री गुलाबराव देवकर यांना 5 वर्षाची शिक्षा सुनावली होती तर सुरेश जैन यांना 7 वर्षाची शिक्षा आणि 100 कोटींचा दंड ठोठावला आहे. सप्टेंबर महिन्यात सुरेश जैन यांनी कोर्टाने ठोठावलेल्या शिक्षेला मुंबई हायकोर्टात आव्हान देत याचिका दाखल केली होती. 

गेल्या काही वर्षापासून घरकुल घोटाळ्याचं प्रकरण न्यायालयात प्रलंबित होतं. तसेच या प्रकरणातील 30 नगरसेवकांना 5 वर्षाची शिक्षा सुनावली होती. जळगाव घरकुल योजना ही जळगाव नगरपालिकेची योजना होती. झोपडपट्टीत राहणाऱ्या लोकांना स्वस्त दरात चांगली घरे देण्यासाठी तत्कालीन नगरपालिकेतील सत्ताधारी गटाने झोपडपट्टी निर्मूलनाच्या उद्देशाने ही योजना राबवण्याचे ठरवले. त्यासाठी हरी विठ्ठलनगर, खंडेरावनगर, समतानगर आणि तांबापुरा या ठिकाणी सुमारे ११० कोटींचे कर्ज काढून ११ हजार घरकुले बांधण्याच्या कामास इ.स. १९९९ मध्ये सुरुवात झाली. मात्र, या योजनेतील सावळागोंधळ सन २००१ मध्ये उघडकीस आला. सुरुवातीपासूनच अनियमितता, कायद्याचे उल्लंघन, मनमानी पद्धतीने निर्णय, गैरव्यवहार यांचे लचांड उघडकीला आले. 

Web Title: Jalgaon Gharkul scam: Suresh Jain granted temporary bail by High Court

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.