"हिंदू असल्याचे सांगताच त्याने हात पकडला अन्..."; मीरा रोड हल्ल्याचा धक्कादायक घटनाक्रम समोर

धर्माची विचारपूस करून सुरक्षा रक्षकांवर जीवघेणा हल्ला; रक्ताळलेला घटनाक्रम समोर

Mira Road Stabbing: मीरा रोड येथील नया नगर भागात रविवारी पहाटे दोन सुरक्षा रक्षकांवर झालेल्या हल्ल्याने संपूर्ण राज्य हादरले आहे. या प्रकरणातील जखमी सुरक्षा रक्षक सुब्रतो सेन यांनी पोलिसांना दिलेल्या जबाबातून अत्यंत धक्कादायक माहिती समोर आली आहे. धर्माची विचारपूस करून आणि कलमा येतो का म्हणत आरोपी जैब अंसारी याने हा हा हल्ला केल्याचे स्पष्ट झाले आहे. महाराष्ट्र दहशतवादी विरोधी पथक या प्रकरणाचा तपास करत आहे.

रात्री ३ वाजता सुरू झाले प्रकरण

सुब्रतो सेन यांनी दिलेल्या माहितीनुसार, २७ एप्रिल २०२६ रोजी पहाटे ३ च्या सुमारास ते कर्तव्यावर असताना एक जैब अंसारी त्यांच्या जवळ आला. त्याने सुरुवातीला विचारले, पुढे मशीद आहे का? सुब्रतो यांनी होकार दिल्यावर त्याने मशिदीचे नाव विचारले. नाव माहित नसल्याचे सांगताच आरोपीने थेट प्रश्न केला, तू हिंदू आहेस का? सुब्रतो यांनी हो म्हटल्यावर तो तरुण तिथून निघून गेला. पण नंतर तो त्याच परिसरातच फिरत होता.

पहाटे साडेचारला थेट वार

पहाटे ४ वाजता सुब्रतो चहा पिण्यासाठी रसाज सिनेमाजवळील इराणी हॉटेलवर गेले, तिथेही जैब अंसारी हजर होता. तिथून परत आल्यावर साडेचारच्या सुमारास आरोपीने सुब्रतो यांचा उजवा हात पकडला आणि तू हिंदू आहेस ना? असे ओरडून चाकूने वार केला. वार चुकवण्याचा प्रयत्न करताना चाकू त्यांच्या पाठीला लागला. जीवाच्या आकांताने सुब्रतो सुपरवायझरच्या केबिनकडे पळाले.

"कलमा वाच नाहीतर..." सुपरवायझरवरही हल्ला

सुब्रतो केबिनमध्ये पोहोचले आणि सुपरवायझर राजकेशर मिश्रा यांना घडलेला प्रकार सांगू लागला. इतक्यात आरोपी तिथेही पोहोचला. त्याने मिश्रा यांना धमकावत विचारले, तू पण हिंदू आहेस ना? नसेल तर कलमा वाच. मिश्रा यांना कलमा वाचता न आल्याने आरोपीने त्यांच्यावर सपासप वार केले. या हल्ल्यात मिश्रा यांच्या पोटात, पाठीत आणि छातीवर गंभीर जखमा झाल्या.

"मी मरेन... मी मरेन..." रडत केला फोन

हल्ल्यानंतर सुब्रतो इमारतीच्या मागे लपून राहिले. काही मिनिटांनी त्यांनी घाबरतच सुपरवायझर मिश्रा यांना फोन केला. त्यावेळी मिश्रा रडत होते आणि "मी मरेन, मी आता वाचणार नाही" असे सांगत होते. सुब्रतो यांनी धाडस करून केबिन गाठले, तेव्हा आरोपी तिथून पसार झाला होता आणि मिश्रा रक्ताच्या थारोळ्यात पडले होते.

आरोपी उच्चशिक्षित शिक्षक

तपासातून समोर आले आहे की, आरोपी जैब अंसारी हा उच्चशिक्षित असून त्याने अमेरिकेत शिक्षण घेतले आहे. तो मुलांना गणित आणि रसायनशास्त्र शिकवत असे. मात्र, तो सातत्याने कट्टरपंथी व्हिडिओ पाहत असे. त्याच्याकडे सापडलेल्या चिठ्ठीत लोन वुल्फ हल्ल्याचा उल्लेख असल्याने आता या प्रकरणाचा तपास एटीएसकडे वर्ग करण्यात आला आहे.