सायबर फसवणुकीची प्रकरणे थांबायचे नावच घेत नाहीयत, आणि आता डिजिटल अरेस्ट प्रकरणात मोठ्या संख्येने ज्येष्ठ नागरिकांना लक्ष्य केले जात आहे. त्यांना तंत्रज्ञानाच्या जाळ्यात ओढून, विश्वास संपादन करून आणि शक्य तितकी मोठी रक्कम ऑनलाइन हस्तांतरित करण्यास भाग पाडले जात आहे. अशीच एक घटना चेन्नईमध्ये घडली आहे.
चेन्नईतील एका ८१ वर्षीय वृद्धाला २.२७ कोटी रुपयांचा ऑनलाइन गंडा घालण्यात आला आहे. आरोपींनी त्यांना 'डिजिटल अटक' करून हे पैसे हडपले. यासाठी, गुन्हेगारांनी वृद्धाला एका बनावट व्हर्च्युअल न्यायालयात हजर केले. हे संपूर्ण 'न्यायालय'च एक फसवणूक होती. धक्कादायक बाब म्हणजे, या फसवणुकीत वृद्धासोबत त्यांची पत्नीही बळी पडली आणि हे दाम्पत्य तब्बल दीड महिना सायबर गुन्हेगारांच्या तावडीत होते.
डीटीनेक्स्टच्या अहवालानुसार, ही घटना मार्चच्या मध्यापासून ते एप्रिलच्या शेवटच्या आठवड्यापर्यंत घडली. या घटनेत वृद्धाने आपली आयुष्यभराची कमाई गमावली.
अशी घडली फसवणूक
पीडित वृद्धाला १५ मार्च रोजी एक फोन आला. फोन करणाऱ्याने स्वतःला 'ट्राय'चा (TRAI) अधिकारी असल्याचे भासवले आणि त्यांच्या आधार कार्डवरून कॅनरा बँकेत खाते उघडल्याचा खोटा दावा केला. सुरुवातीला आरोपी हिंदीत बोलत असल्याने वृद्धाला भाषा समजत नव्हती. त्यानंतर, एका तमिळ बोलणाऱ्या व्यक्तीला कॉलवर जोडण्यात आले आणि त्याने वृद्धाला विश्वास दिला की, त्यांचे हे प्रकरण राष्ट्रीय सुरक्षेशी संबंधित आहे आणि त्यांना याबद्दल कोणाशीही बोलू नये. आरोपींनी वृद्धाला हे पटवून दिले की, चूक त्यांच्याकडूनच झाली आहे.
धमक्या आणि पैशांची मागणी
आरोपींनी वृद्धाकडून त्यांच्या सर्व बँक खात्यांतील पैशांची माहिती मागितली. त्यांना आणि त्यांच्या पत्नीला 'निगराणीखाली' असल्याचे सांगून, घराबाहेर न जाण्याची आणि कोणाशीही न बोलण्याची धमकी दिली. यानंतर, आरोपींनी त्यांच्याकडून ५९ लाख रुपये एका खात्यात हस्तांतरित करण्यास भाग पाडले.
'डिजिटल कोर्ट'चा बनावट देखावा
पैसे हस्तांतरित केल्यानंतर, त्यांना ऑनलाइन न्यायालयात सादर होण्याचा आदेश देण्यात आला. वृद्ध आणि त्यांची पत्नी एका डिजिटल कोर्टात हजर झाले. यावेळी एका बनावट न्यायाधीशाला आणण्यात आले होते. या न्यायाधीशाने त्यांना आणि त्यांच्या पत्नीला सात दिवसांसाठी सीबीआयच्या 'डिजिटल अरेस्ट'मध्ये ठेवले जाईल असे सांगितले आणि या प्रकरणाबद्दल पूर्णपणे गप्प राहण्याचे आदेश दिले.
संपूर्ण कमाई लुटली!
यानंतर, आरोपींनी पद्धतशीरपणे वृद्धाकडून पैसे उकळण्यास सुरुवात केली. त्यांच्या मुदत ठेवी (FD) देखील तोडून त्याची रक्कम थोड्या थोड्या हप्त्यांमध्ये हस्तांतरित करण्यास भाग पाडले. अशा प्रकारे, वृद्धाने एकूण २.२७ कोटी रुपये हस्तांतरित केले.
अखेरचा प्रयत्न आणि सत्य उघड
एवढे मोठे नुकसान झाल्यानंतरही आरोपी थांबले नाहीत. त्यांनी वृद्धाला आपल्या मुलांकडून आणि मुलींकडून पैशांची व्यवस्था करण्यास सांगितले, इतकेच नाही तर मालमत्ता विकण्यासही सांगितले. अखेरीस, एके दिवशी वृद्धाने आपल्या जावयाला फोन करून बोलावले आणि संपूर्ण प्रकरणाचा खुलासा झाला. आता या प्रकरणाची सखोल चौकशी सुरू आहे.