अमानुषतेचा कळस! 13 वर्षीय मुलीवर बलात्कार; डोळे फोडले अन् जीभही कापली

मागील आठवड्यात उत्तरप्रदेशमध्ये सहा वर्षीय मुलीवर अपहरण करू बलात्कार केला गेला होता.

लखनौ : उत्तरप्रदेशमध्ये पुन्हा एका अल्पवयीन मुलीवर बलात्कार झाल्याची घटना समोर आली आहे. येथील लखीमपूर खीरी जिल्ह्यात 13 वर्षीय मुलीवर बलात्कार करून तिची हत्या करण्यात आली आहे. शनिवारी ऊसाच्या शेतात या मुलीचे मृतदेह पोलिसांना सापडले. राज्यातील मागील काही दिवसांतील ही दुसरी भयानक घटना आहे. या प्रकरणी गावातील दोघांना अटक करण्यात आली आहे.

मुलीची गळा दाबून हत्या केली, तिचे डोळे फोडले आणि जीभही कापल्याचा दावा पिडीत मुलीच्या वडीलांनी केला. शुक्रवारी ही घटना घडली. लखनौपासून 130 किलोमीटर अंतरावर असलेलं हे गाव नेपाळ सीमेनजीक आहे. तिचा मृतदेह एका आरोपिच्या शेतात सापडला. रविवारी मुलीच्या शवविच्छेदनाचा रिपोर्ट समोर आला आणि त्यात डोळे फोडल्याचा किंवा जीभ कापली नसल्याचा दावा उत्तर प्रदेश पोलिसांनी केला आहे. शवविच्छेदनात बलात्कार आणि गळा आवळण्याचा उल्लेख केला आहे. 

''तिचे डोळे फोडलेले नाहीत आणि जीभही कापली गेली नाही. तो दावा खोटा आहे. शवविच्छेदनाच्या रिपोर्टमध्ये असे काहीच आढळले नाही. तिच्या डोळ्यानजीक  ओरखडण्याच्या खुणा आहेत आणि त्या ऊसाच्या पानांमुळे झाल्याचे दिसते,''असे पोलिस अधिकारी खेरी सतेंद्र कुमार यांनी सांगितले. ते पुढे म्हणाले,''तिच्यावर बलात्कार झाला आहे. त्याप्रकरणी दोघांना अटकही करण्यात आली आहे. त्यांच्याविरोधात बलात्कार, खूनाचा गुन्हा दाखल करण्यात आला आहे.''

शुक्रवारी दुपारपासून ती मुलगी बेपत्ता होती. ''आम्ही तिला सगळीकडे शोधत होतो आणि ऊसाच्या शेतात तिचा मृतदेह सापडला. तिचे डोळे फोडले होते आणि जीभ कापली होती. तिच्याच ओढणीनं गळा आवळला होता,''असे मुलीच्या वडीलांनी सांगितले. 

उत्तर प्रदेशच्या माजी मुख्यमंत्री मायावती यांनी या घटनेवर जोरदार टीका केली. त्यांनी ट्विट केलं की,''लखीमपूर खीरी येथे दलित अल्पवयीन मुलीवर अमानुष छळ केला गेला. ही घटना अत्यंत वेदनादायी आणि लाजिरवाणी आहे. अशा घटना घडत आहेत, तर मग सपा आणि भाजपा सरकार यांच्यात काय फरक राहिला? सरकारनं दोषिंवर कठोरात कठोर कारवाई करावी.''  
 

यूपी के लखीमपुर खीरी के पकरिया गाँव में दलित नाबालिग के साथ बलात्कार के बाद फिर उसकी नृशंस हत्या अति-दुःखद व शर्मनाक। ऐसी घटनाओं से सपा व वर्तमान भाजपा सरकार में फिर क्या अन्तर रहा? सरकार आजमगढ़ के साथ खीरी के दोषियों के विरूद्ध भी सख्त कार्रवाई करे, बीएसपी की यह माँग है।

— Mayawati (@Mayawati) August 15, 2020

मागील आठवड्यात उत्तरप्रदेश येथील हापूर येथे 6 वर्षीय मुलीवर बलात्कार करण्यात आला होता. तिचे अपहरण केले होते. पोलिसांनी आरोपीला अटक केले आहे. ती मुलगी अजूनही हॉस्पिटलमध्ये मृत्यूशी झुंज देत आहे.