उपजिल्हा रुग्णालयात पाण्याचा ठणठणाट

 मधुकर सिरसट- केज शहरापासून २ कि.मी. अंतरावर असलेल्या येथील उपजिल्हा रुग्णालय व परिसरात पाण्याचा ठणठणाट जाणवू लागला आहे. विंधन विहिरीला पाणी येत नसल्याने शासकीय निवासस्थानात राहणार्‍या अधिकारी व कर्मचार्‍यांसह रुग्ण व नातेवाईकांचे पाण्यासाठी हाल होत आहेत. याकडे प्रशासनाचे दुर्लक्ष होत असून, पाणीपुरवठा करण्याची मागणी केली जात आहे. केज येथील उपजिल्हा रुग्णालयात वैद्यकीय अधिकारी, आरोग्य कर्मचारी मिळून शंभरहून अधिक कर्मचारी रुग्णालय परिसरातील शासकीय निवासस्थानात राहतात. रुग्णालय परिसरात त्यांना पाणीपुरवठा करण्यासाठी एक विंधन विहीर घेण्यात आली असून, पंधरा दिवसांपासून या विहिरीचे पाणी संपल्यामुळे पाणीटंचाईने उग्ररुप धारण केले आहे. याचा फटका उपजिल्हा रुग्णालयात कार्यरत असलेल्या वैद्यकीय अधिकारी, आरोग्य कर्मचार्‍यांसह रुग्ण व नातेवाईकांना बसू लागला आहे. पैसे खर्चून टँकरद्वारे पाणीपुरवठा या प्रकरणी नुकतेच वैद्यकीय अधीक्षक म्हणून रुजू झालेले डॉ. अशोक थोरात यांच्याशी याबाबत विचारणा केली असता ते म्हणाले, पैसे खर्च करुन टँकरद्वारे कर्मचारी आणि रुग्ण व त्यांच्या नातेवाईकांसाठी सध्या पाणीपुरवठा करण्यात येत आहे. रुग्णालय केज हद्दीत नसल्याने अडचणी केज नगर पंचायतीचे मुख्याधिकारी रामदास कोकरे ‘लोकमत’शी बोलताना म्हणाले, पाणीटंचाई दूर करण्यासाठी व नवीन विंधन विहिरी घेण्यासाठी शासनाकडून निधी मिळाला आहे. परंतु केज येथील उपजिल्हा रुग्णालय हे केज नगर पंचायतीच्या हद्दीत येत नाही. ते पिसेगाव ग्रामपंचायतीच्या हद्दीत येत असल्यामुळे त्याठिकाणी शासनाचा निधी पाणीटंचाई दूर करण्यासाठी वापरण्यास अडचणी निर्माण झाल्या आहेत. केज हद्दीत हे रुग्णालय असले असते तर येथील पाणीटंचाई दूर करण्यासाठी आम्ही प्रयत्न केले असते. येथील उपजिल्हा रुग्णालयात पाण्याचा ठणठणाट जाणवत असला तरी ही पाणीटंचाई दूर करण्यासाठी आम्ही सर्वतोपरी प्रयत्न करू. रेफर रुग्णालय फलक पुसणार येथील उपजिल्हा रुग्णालयात वैद्यकीय अधीक्षक म्हणून रुजू होताच डॉ. अशोक थोरात यांचा भाजपाचे जिल्हा उपाध्यक्ष सुनील गलांडे, काँग्रेसचे राहुल सोनवणे, पशुपतीनाथ दांगट, भाजपाचे जिल्हा चिटणीस दत्ता धस, शहराध्यक्ष प्रकाश गुंड, शिवसेनेचे तालुकाप्रमुख रत्नाकर शिंदे व इतर सर्व पक्षांच्या कार्यकर्त्यांनी डॉ. अशोक थोरात यांचा रुजू झाल्याबद्दल सत्कार केला. यावेळी डॉ. थोरात म्हणाले, महिला व प्रसूती तज्ज्ञ रुग्णालयाला मिळाल्यामुळे लवकरच कायमस्वरुपी भूलतज्ज्ञाची नियुक्ती येथे होणार आहे. त्यामुळे प्रसुतीचे आणि इतर रुग्णांना स्वाराती रुग्णालयात नेहमी ‘रेफर’ करावे लागत होते. यापुढे सर्व प्रकारच्या शस्त्रक्रिया, प्रसुती रुग्णालयातच होतील. ‘रेफर’ रुग्णालय हा फलक पुसून टाकला जाईल. वैद्यकीय अधीक्षक म्हणून येथील उपजिल्हा रुग्णालयात रुजू झालेले डॉ. अशोक थोरात यांनी रुजू होताच विविध समस्या सोडविण्याचे आश्वासन दिल्यामुळे वैद्यकीय अधिकार्‍यांसह आरोग्य कर्मचारी, रुग्ण व नातेवाईकांना दिलासा मिळाला आहे. पाणीटंचाईबाबतही त्यांनी ठोस उपाययोजना करून पाणीटंचाई दूर करावी, अशी मागणी अधिकार्‍यांसह रुग्ण व नातेवाईकांमधून होत आहे.