घराची भिंत कोसळून वृद्धा जागीच ठार

तामलवाडी : सलग चार तास पडलेल्या दमदार पावसाने घराची भिंत कोसळून वृद्धा जागीच ठार, तर त्यांचा मुलगा गंभीर जखमी झाला.

तासगाव : सांगली येथे २७ सप्टेंबरला होणाऱ्या मराठा क्रांती मोर्चासाठी तासगाव तालुक्यातील सकल मराठा समाजाने जोरदार कंबर कसली आहे. तालुक्यातील गावन् गाव मराठामय झाल्याचे चित्र आहे. गावा-गावात बैठकांचा धडाका सुरु असून, मोर्चाची जय्यत तयारी केली जात आहे. या मोर्चासाठी अनेक जाती-धर्माच्या संघटनांकडून पाठिंबा दिला जाता असून, मोर्चासाठी अनेक संस्थांकडून सुटी जाहीर केली जात आहे.
सांगली येथे होणाऱ्या मराठा क्रांती मोर्चाच्या पार्श्वभूमीवर तालुक्यातील गावा-गावात बैठका घेण्यात येत आहेत. यासाठी शहरातील तरुण प्रमुख पदाधिकाऱ्यांचे विविध चार संघ तयार करण्यात आले आहेत. हे संघ क्रांती मोर्चाचे महत्त्व, काम, उद्देश याबाबत माहिती देण्याचे काम करत आहेत. गेल्या चार दिवसांपासून दररोज चार ते पाच गावात हे संघ जाऊन याबाबत बैठका घेत आहेत. बहुतांश गावांतून या बैठका झाल्या असून बैठकीसाठी मोठा प्रतिसाद मिळत आहे. तालुक्यातील प्रत्येक गावात मराठामय वातावरण तयार झाले आहे. तसेच या बैठकांमधून आर्थिक मदतीची घोषणा केली जात आहे. प्रत्येक बैठकीला आठ ते दहा हजार रुपयांची मदत जमा होत असल्याचे सांगण्यात आले.
मराठी क्रांती मोर्चाला तासगाव तालुक्यातील मुस्लिम समाज, लिंंगायत समाज, माळी समाज, गुरव समाज, जैन समाज, तसेच घिसाडी समाजाच्यावतीने पाठिंंबा देण्यात आला आहे.
मोर्चासाठी जाणाऱ्या लोकांना तासगाव ते सांगली मार्गावर विविध समाज तसेच गावांतून पाण्याच्या बाटल्या, सरबत, चहा, नाष्टा वाटप करण्यात येणार आहे. तासगाव येथील विटा नाका तसेच चिंंचणी नाका येथे मुस्लिम समाजाच्यावतीने पाण्याच्या बाटल्यांचे वाटप करण्यात येणार आहे. मात्र या बाटल्या कोठेही अन्यत्र न फेकता कचराकुंडीतच टाकण्याचे आवाहन करण्यात आले आहे.
मोर्चात मोठ्या प्रमाणात सहभागी व्हावे यासाठी प्रत्येक शाळा, महाविद्यालयातील वर्गा-वर्गात जाऊन आयोजकांनी या मोर्चाचे महत्त्व तसेच जागृती करण्याचे काम सुरू केले आहे. विद्यार्थ्यांसह विद्यार्थिनींचा मोठा पाठिंंबा मिळत असल्याचे सांगितले.
तासगावहून सांगली येथे जाण्यासाठी विशेषत: महिलांच्या सोयीसाठी तासगावमधून अनेक वडापचालक तसेच मालवाहतूक संघटना आपली वाहने चौका-चौकात उभी करणार असून, त्याचा लाभ घ्यावा, असे आवाहन केले आहे. मोर्चासाठी तालुक्यातील प्राध्यापक, डॉक्टर, अभियंते आणि वकील यांचे संघ तयार करण्यात आले आहेत. यातील प्रमुख दोघांवर सर्वांची जबाबदारी देण्यात आली आहे. यामध्ये नगरपालिका शिक्षण मंडळही सहभागी असल्याचे आयोजकांनी सांगितले.
मोर्चासाठी तालुक्यातून लाखांहून अधिक लोक जाण्याची शक्यता आहे. याचे नियोजन व्यवस्थित होण्याकरिता तासगाव शहरात जवळपास ५० स्वयंसेवकांची निवड करण्यात येणार आहे. शिवाय गावपातळीवरही त्या त्या संघटनांनी स्वयंसेवकांची निवड करण्याचे आवाहन करण्यात आले आहे. (वार्ताहर)