योजना राबविलेल्या गावांतही टॅँकर

 विलास भोसले , पाटोदा तालुक्यातील अनेक गावांमध्ये पाणीपुरवठा योजनांवर कोट्यवधी रुपये खर्च करण्यात आले आहेत. असे असले तरी आता तेथे टॅँकर सुरू झाले आहेत. या गावांच्या परिसरात पाणी उपलब्ध असतानाही टँकर सुरू कसे? असा प्रश्न उपस्थित केला जात आहे. पाटोदा तालुक्यातील आनपटवाडी, नफरवाडी, सावरगाव, गितेवाडी, मंझरी घाट, वैजाळा, बेनसूर, सावरगाव, गांधनवाडी अशा नऊ गावांमध्ये सध्या टॅँकरने पाणीपुरवठा करण्यात येत आहे. या गावांना भायाळा आणि मंगेवाडी या प्रकल्पातून पाणीपुरवठा होत आहे. शासन नियमानुसार २ कि. मी. च्या आत पाणी उपलब्ध असल्यास टॅँकर सुरू करू नये. असे असतानाही टँकर सुरू करण्यात आले आहेत. शिवाय १४ गावांमध्ये विहीर, कूपनलिका अधिगृहित केल्याचे प्रशासनाकडून सांगण्यात आले. नफरवाडी येथे २००५-०६ मध्ये नळयोजना केलेली आहे. येथील पाणी कमी झाल्याचे कारण देत येथे टॅँकर सुरू केले आहे. वास्तविक या गावच्या परिसरात बागायती जमीन आहे. सावरगाव येथेही १ कोटी ३ लाख रुपये खर्च करून योजना राबविण्यात आली. काम अपूर्ण असल्याने येथे आता पुन्हा खर्च करण्यात येणार आहे. मंजरी घाट येथेही पाणीपुरवठा योजना राबविण्यात आलेली आहे. येथे विहीर खोदण्यात आली होती. या विहिरीतून मुबलक पाणीपुरवठा होत नसल्याचे सांगत येथेही टॅँकर सुरू करण्यात आले. वास्तविक हे गाव मांजरा नदीकाठी असून भोवताली बागायती जमीन आहे. घुमरा पारगाव येथे तीन ते चारवेळेस पाणीपुरवठा योजनेवर खर्च करण्यात आलेला आहे. येथेही आता टॅँकर सुरू करण्यात आले आहे. आनपटवाडीसह वाडी-वस्त्यांवरही टॅँकर सुरू करण्यात आले आहे. सावरगाव येथील नळयोजना अद्यापही अपूर्ण आहे, तर गितेवाडी, गांधनवाडी या गावाजवळ पाणी उपलब्ध असतानाही तेथे टॅँकर सुरू करण्यात आले आहे. यावर्षी पाणीपातळी समाधानकारक असली तरी अनेक ठिकाणी टॅँकर सुरू करण्यात आले असल्याने आश्चर्य व्यक्त केले जात आहे. यासंदभात ग्रामीण पाणीपुरवठा विभागातील उपअभियंता चव्हाण म्हणाले, वरिष्ठांच्या आदेशाने टॅँकर सुरू केले आहेत. (वार्ताहर)