निकृष्ट दर्जाचे काम झाल्याने साळेगाव-लाखा रस्ता उखडला!

केज: केज तालुक्यातील साळेगाव ते लाखा हा पूर्णत: उखडला असून, वाहनधारकांना येथून जाताना कसरत करावी लागत आहे. आजारी रुग्ण आणि प्रसूतीसाठी महिलांना याच रस्त्यावरुन जावे लागत असल्याने त्यांचे एक प्रकारे हेळसांड होत आहे. या रस्ता कामाची चौकशी करुन डांबरीकरण करण्यात यावे, अशी मागणी केली जात आहे. साळेगाव-मांगवडगाव ते लाखा हा १२ कि.मी.चा डांबरी रस्ता करण्यात आला होता. पण गुत्तेदाराकडून निकृष्ट दर्जाचे काम झाल्याने या मार्गावरील रस्ता पूर्णत: उखडला आहे. ठिकठिकाणी मोठे खड्डे पडले आहेत. खड्डे चुकविण्याच्या नादात अपघातही होत आहेत. दोन महिन्यात पाच ते दहा दुचाकी घसरुन पडल्याच्या घटना घडल्या आहेत. केज पंचायत समितीच्या सभापतीपदी तारामती उबाळे यांची वर्णी लागल्यानंतर या भागात विकास होईल, अशी अपेक्षा नागरिकांना होती. मात्र बससेवा सुरू करण्यापलीकडे त्यांना इतर कामे करण्यात आली नसल्याची खंत शशिकांत थोरात, बापू डिसले यांनी व्यक्त केली. या निकृष्ट झालेल्या कामाची चौकशी करुन योग्य ती कारवाई करावी अन्यथा आंदोलन करू, असा इशारा जीवन रामीष्ठ, शहाजीराव इंगळे, नाना भांगे, हनुमंत घाडगे, आश्रुबा वायबसे, बंडू भांगे, दत्ता इंगळे, पांडुरंग इंगळे, शशिकांत थोरात आदींनी तहसीलदारांकडे दिलेल्या निवेदनाद्वारे केला आहे. (वार्ताहर)