घरकुलाच्या पाट्या आल्या पण; घरकुलांचा पत्ताच नाही!

परळी : तालुक्यातील साडगाव येथील नऊपैकी एका लाभार्थ्याला इंदिरा आवास योजना घरकुल योजनेचे दोन हप्ते मिळाल; परंतु तिसरा हप्ता मिळाला नाही. तर आठ लाभार्थ्यांना समाज कल्याणतर्फे पाट्या मिळाल्या पण; घरकुलांचा मात्र पत्ता नाही. त्यामुळे आठ लाभार्थी बेघर असून त्यांच्यावर न्यायासाठी संघर्ष करण्याची वेळ आली आहे. याबाबत बोलताना लाभार्थी म्हणाले, २०१३ मध्ये इंदिरा आवास घरकुल योजनेत १५ हजार व १० हजारांचे दोन हप्ते मिळाले असून सारडगावला घरकुलही बांधले. तिसरा १८ हजार ५०० चा हप्ता मात्र अद्याप मिळालेला नाही. यासाठी आमच्यावर संघर्ष करण्याची वेळ आली असल्याचे दत्तू गायकवाड यांनी सांगितले. दुसर्‍या हप्त्यालाही उपोषणाचा इशारा द्यावा लागला होता, आणखी तीच वेळ आली असल्याचेही त्यांनी सांगितले. आम्हाला तर काहीच नाही घरकुलाच्या पाट्या आल्या; परंतु त्या अद्याप मिळाल्या नसल्याचे सारडगावचे वैद्यनाथ घनघाव, शेषेराव घनघाव यांनी सांगितले. याबाबत गटविकास अधिकारी संजय केंद्रे म्हणाले, सारडगावच्या लाभार्थ्यांना घरकुल का नाहीत? याची चौकशी करण्यात येईल. लाभार्थ्यांची गैरसोय होणार नाही याची काळजी घेऊ, असे सांगितले. या लाभार्थ्यांच्या घरकुलांसंदर्भात पं.स.ने पाठपुरवा न केल्यास अ‍ॅड. अनंतराव जगतकर यांनी आंदोलनाचा इशारा दिला. (वार्ताहर)