मनपाचे एक ना धड भाराभर चिंध्या

नांदेड : महानगरपालिकेकडून मोठा गाजावाजा करुन मोहिमा सुरु करण्यात येतात, परंतु मध्येच न समजण्यासारख्या कारणामुळे त्या बंदही पडतात़ आता पुन्हा एकदा मनपाला शहरातील अनधिकृत बांधकामाची आठवण झाली असून मंगळवारपासून विशेष मोहीम सुरु करण्यात आली आहे़ त्यामुळे एक ना धड भाराभर चिंद्या अशी या मोहिमांची अवस्था झाली आहे़ शहरात मनपाकडून यापूर्वीही अनधिकृत बांधकाम, अनधिकृत नळजोडणी, मोबाईल टॉवर, अतिक्रमण, करवसुली अशा विविध मोहिमा राबविण्यात आल्या़ मोहिमांची सुरुवात मोठी गाजावाजा करीत होत असताना, मध्येच या मोहिमा थांबविण्यात येतात़ त्यामुळे पहिल्या टप्प्यात जोर असलेल्या या मोहिमांची अखेरच्या टप्प्यापर्यंत हवा गुल होते़ त्यामुळे नांदेडकरांनाही या मोहिमांबद्दल विशेष आकर्षण राहिले नाही़ एकट्या डॉक्टरलेन भागात पार्कींगच्या जागेसाठी मनपाकडून गेल्या तीन ते चार वर्षांत डेडलाईन या शब्दाचा कितीतरी वेळा वापर करण्यात आला़ त्यामुळे एखाद्या मोहिमांची डेडलाईन नेमकी कोणती ठरवायची? असा प्रश्नही नांदेडकरांना पडत आहे़ पुन्हा एकदा अनधिकृत बांधकामाची मनपाला आठवण झाली आहे़ त्यासाठी २७ मे पासून विशेष मोहीम सुरु केली आहे़ विविध क्षेत्रीय कार्यालयाअंतर्गत सुुरु असलेल्या अनधिकृत बांधकामाची तपासणी करुन ती बांधकामे थांबविणे किंवा पाडण्याची कारवाई करण्यात येणार आहे़ या पथकात सहाय्यक आयुक्त, नियंत्रक आणि महापालिकेचे पोलिस पथक राहणार आहे़ हे पथक क्षेत्रिय कार्यालय क्रमांक १ ते ६ दरम्यान शिवाजीनगर, अशोकनगर, इतवारा, वजिराबाद, भाग्यनगर, तरोडा बु़ आणि खु़, विमानतळ परिसर, सिडको, हडको, कौठा आदी परिसरात सुरु असलेल्या बांधकामाची तपासणी करुन यापूर्वी पूर्वसूचना दिल्यानंतरही नव्याने सुरु असलेले अनधिकृत व मंजूर नकाशाविरुद्धचे बांधकाम तत्काळ थांबवून पाडण्याची कारवाई केली जाणार आहे़ तर दुसरीकडे मनपाची नालेसफाईची मोहीमही तीन दिवसांपासून सुरु आहे़ मनपाने नव्याने सुरु केलेली ही मोहीम तरी, अखेरपर्यंत जाईल, अशी अपेक्षा व्यक्त होत आहे़ (प्रतिनिधी)