संगीत खुर्चीचा खेळ संपला

अंबड : अंबड पोलीस ठाण्यात सुरु झालेला संगीत खुर्चीचा खेळ अखेर शनिवारी संपला. अहमदनगर जिल्हयातील नेवासा येथुन आलेल्या पोलीस निरीक्षक मुकुंद आघाव यांनी ७ जुन रोजी सायंकाळी अंबड पोलीस ठाण्याचा पदभार स्वीकारला.
विशेष म्हणजे आघाव यांनी यापूर्वी काही काळ अंबड पोलीस ठाण्यात पोलीस उपनिरीक्षक पदावर सेवा केलेली आहे. त्यामुळे तालुक्यात उच्छाद मांडलेल्या वाळू माफियांसह बोकाळलेल्या अवैध धंद्याना चाप लावण्याची अपेक्षा त्यांच्याकडुन व्यक्त होत आहे.
अंबडचे पोलीस निरीक्षक वसंत कांबळे यांची औरंगाबाद जातपडताळणी विभागात उपविभागीय पोलीस अधिकारी पदी पदोन्नतीवर बदली झाली. कांबळे यांच्यानंतर अंबड पोलीस ठाण्याचा तात्पुरता पदभार सहाय्यक पोलीस निरीक्षक विवेक पाटील यांच्याकडे सोपविण्यात आला.
दरम्यानच्या काळात २९ मे रोजी रात्री १० वाजेच्या सुमारास सेवली येथील पोलीस निरीक्षक एस.एस.गायकवाड यांनी अंबड पोलीस ठाण्याचा कार्यभार स्वीकारला.
मात्र दुसऱ्याच दिवशी म्हणजे ३० मे रोजी दुपारी २ वाजेच्या सुमारास गायकवाड पदभार पुन्हा एकदा सहाय्यक पोलीस निरीक्षक विवेक पाटील यांना सोपवून सेवली येथे रुजु होण्यासाठी रवाना झाले. एकाच दिवसात पोलीस निरीक्षकाच्या झालेल्या बदलीने अनेकांच्या भुवया उंचावल्या.
मात्र या बदलीविषयी कोणतीही अधिकृत माहिती मिळू शकली नाही. अंबड पोलीस ठाण्यात सुरु झालेला हा संगीत खुर्चीचा खेळ अखेर ७ जून रोजी सायंकाळी संपला. अहमदनगर जिल्हयातील नेवासा येथून आलेले पोलीस निरीक्षक मुकुंद आघाव यांनी अंबड पोलीस ठाण्याचा पदभार स्वीकारला.
सध्या अंबड तालुक्यात वाळु तस्करी, मटका, जुगार, पत्त्यांचे अडडे, रोडरोमियो, अवैध मद्यविक्री, स्वस्त धान्याचा काळाबाजार, अवैध वाहतुक आदी समस्यांनी उच्छाद मांडला असुन पोलीस निरीक्षक आघाव याविषयी काय कारवाई करतात याकडे नागरिकांचे लक्ष लागले आहे. याशिवाय तालुक्यात गुन्हेगारीचे स्वरूपही वाढले असून त्यावर नियंत्रण बसणे आवश्यक आहे.
जिल्हा पोलिस अधीक्षक ज्योतिप्रिया सिंह यांनी जिल्ह्यातील अवैध धंद्यांविरुद्ध उघडलेली मोहीम अंबड तालुक्यातही यशस्वी होणे आवश्यक आहे.
त्यासाठी प्रयत्न करण्याची जबाबदारी नवीन पोलिस निरीक्षक या नात्याने आघाव यांच्यावर आली आहे. दरम्यान, पोलीस निरीक्षक आघाव यांनी पदभार स्वीकारल्यानंतर ठाण्यातील अधिकारी, कर्मचाऱ्यांनी त्यांचे स्वागत केले. (वार्ताहर)