‘मांजरा’चे पाणी बंद !

 मधुकर सिरसट , केज धारूरसह एकूण १४ गावांना पाणीपुरवठा करणार्‍या मांजरा धरणातील पाणीपातळी खालावल्यामुळे मांजरातून होणारा पाणीपुरवठा बंद पडला आहे. केज शहराच्या पाणीटंचाईला दूर करण्यासाठी १३ व्या वित्त आयोगातून ३९ लाखांचा निधी मंजूर झाला आहे. मांजरातील पाण्याचा एकूण साठा ०३.३८७ द.ल.घ.मी.पर्यंत खालावल्यामुळे मांजरा धरणात चर खोदूनही पाणीपुरवठा करणार्‍या विहिरीकडे पाणी येणे बंद झाल्यामुळे मांजरातील पाणीपुरवठा कायमचा बंद झाला आहे. त्यामुळे केज शहरातील पाणीटंचाई वाढली आहे. मागील महिन्यात विभागीय आयुक्त संजीव जयस्वाल यांनी अधिकार्‍यांची बैठक घेऊन पाणीटंचाईवर उपाययोजना सुचविल्या होत्या. येथील नगर परिषदेचे मुख्याधिकारी रामदास कोकरे यांनी अंदाजपत्रक तयार करून जिल्हाधिकारी बीड यांच्याकडे पाणीपुरवठ्याच्या पर्यायी योजनेसाठी निधी मिळावा म्हणून प्रस्ताव सादर केला होता. जिल्हाधिकारी नवलकिशोर राम यांनी तेराव्या वित्त आयोगातून केज शहरातील पाणीटंचाईचे संकट दूर करण्यासाठी ३८ लाख ७९ हजार ७१ रुपयांचा निधी मंजूर केला आहे. या निधीतून युद्धपातळीवर काम करून नागरिकांच्या पाणीप्रश्नाला प्राधान्य दिले जाईल, असे नगराध्यक्षा शीतल दांगट, उपनगराध्यक्ष आदित्य पाटील यांनी ‘लोकमत’शी बोलताना सांगितले. हा निधी मिळाल्यामुळे केज शहरातील पाणीटंचाई दूर करण्यासाठी आम्हाला यश येईल, असा विश्वास मुख्याधिकारी रामदास कोकरे यांनी व्यक्त केला. टँकरने मोफत पाणी केज नगर पंचायतीचे विरोधी गटनेते हारूण इनामदार यांनी केज शहरातील वाढती पाणीटंचाई लक्षात घेऊन तीन महिन्यांपूर्वीच निधन झालेल्या वडिलांच्या स्मरणार्थ कै. चांदपाशा इनामदार यांच्या नावाने ५ मेपासून ५ जून या एक महिन्यासाठी टँकरद्वारे मोफत पाणीपुरवठा करण्यास पुढाकार घेतला आहे. ६ कि.मी. अंतरावरून टँकरने पाणी आणून पाणीटंचाई असलेल्या प्रभागात पाणीपुरवठा केला जात आहे. दररोज ५ ते ६ टँकरच्या खेपा करण्यात येत असून हे सर्व पाणी मोफत देण्यात येत आहे. ५ हजार लिटर क्षमतेच्या टँकरद्वारे एक महिनाभरासाठी मोफत पाणीपुरवठा सुरू केल्यामुळे हारूण इनामदार यांचे नागरिकांमधून स्वागत होत आहे. निधी कशासाठी मंजूर? मांजरा धरणातून होणारा पाणीपुरवठा पंधरा दिवसांपासून बंद झाल्याने केज शहरात तीव्र पाणीटंचाई जाणवू लागली आहे. आयोगाकडून मिळालेला निधी हा जाधव जवळा पाझर तलावातून केजसाठी पर्यायी पाणीपुरवठा योजनेची पाईपलाईन आरसीसी, सिमेंटची टाकी बांधणे, प्रभाग १ चे १६ मध्ये आवश्यकतेनुसार विंधनविहिरी खोदणे, त्यावर मोटारी बसविणे, पाईपलाईन करणे यासाठी हा निधी मंजूर करण्यात आला आहे. लवकरच हा निधी मिळणार आहे.