महसूल वाढीच्या प्रयत्नांना तलाठ्यांनी दिला खो

सुनील कच्छवे , औरंगाबाद शासनाचा महसूल वाढविण्यासाठी नगररचना विभागाने शहरालगतच्या गावांचे गटनिहाय बाजारमूल्य निश्चित करण्याचे काम हाती घेतले आहे. त्यासाठी तलाठ्यांकडून आवश्यक माहिती मागविण्यात आली आहे. मात्र, महिना उलटूनही एकाही तलाठ्याने ही माहिती दिलेली नाही. त्यामुळे गटनिहाय बाजारमूल्य निश्चित करण्यात अडचणी येत आहेत. नगररचना (मूल्यांकन) विभागाच्या वतीने दरवर्षी जमिनीचे शासकीय दर निश्चित केले जातात. सध्या जिल्ह्याचे २०१५ सालाचे बाजारमूल्य निश्चित करण्याचे काम सुरू आहे. सहायक संचालक कार्यालयातर्फे जूनअखेरीस हे मूल्य निश्चित करून त्याचा अहवाल पुणे येथील वरिष्ठ कार्यालयाला सादर केला जाणार आहे. बहुतेक ग्रामीण भागात गावात सरसकट एकच दर आकारले जातात. जमिनीच्या खरेदी-विक्रीचे व्यवहार करताना हाच दर गृहीत धरून त्यानुसार मुद्रांक व नोंदणी शुल्क आकारले जाते. मात्र, गेल्या काही दिवसांत औरंगाबाद शहराजवळील गावांची झपाट्याने वाढ होत आहे. अनेक बांधकाम व्यावसायिक या गावांकडे वळले असून, तेथे मोठमोठे गृहप्रकल्प उभे राहत आहेत. हे लक्षात घेऊन नगररचना विभागाने या गावांचे गटनिहाय बाजारमूल्य निश्चित करण्याचे ठरविले आहे. ज्या गटांमध्ये बांधकाम प्रकल्प किंवा अकृषक परवानगी घेतली गेली त्या ठिकाणचे बाजारमूल्य वाढविण्यासाठी हे काम केले जात आहे. त्यामुळे शासनाचा महसूल मोठ्या प्रमाणावर वाढणार आहे. गटनिहाय बाजारमूल्य निश्चित करण्यासाठी संबंधित गावांमधील जमिनीच्या प्रकाराची गटनिहाय माहितीही आवश्यक आहे. त्यासाठी सहायक संचालक कार्यालयाने महिनाभरापूर्वी तलाठ्यांना पत्र पाठवून ही माहिती मागविली. औरंगाबाद शहराजवळील ५१, खुलताबाद तालुक्यातील ५, वैजापूर तालुक्यातील ५, सिल्लोड तालुक्यातील ६, सोयगाव तालुक्यातील ४, कन्नड तालुक्यातील ५, पैठण तालुक्यातील १२ आणि गंगापूर तालुक्यातील १९ गावांची माहिती मागविण्यात आली आहे. मात्र, महिना उलटला तरी एकाही तलाठ्याने अद्याप ही माहिती सादर केलेली नाही. या गावांची होणार गटनिहाय बाजारमूल्य निश्चिती सातारा, देवळाई, बाळापूर, गांधेली, हनुमंतगाव, सहजापूर, वडगाव कोल्हाटी, तीसगाव, पंढरपूर, वळदगाव, पाटोदा, गोलवाडी, गंगापूर नेहरी, दौलताबाद, रावरसपुरा, शेंद्रा कमंगर, सुंदरवाडी, फत्तेपूर, हिरापूर, पिसादेवी, सावंगी, झाल्टा, गेवराई, कुंभेफळ, ओहर, अंतापूर, अश्रफपूर, दौलतपूर, गोपाळपूर, जटवाडा, कृष्णापूरवाडी, मल्हारपूर, मांडकी, सुलतानपूर, तुळजापूर, कच्चीघाटी, सैजतपूर, गिरनेरा, आडगाव, बागतलाव, वरूड, गंगापूर जहांगीर, शेंद्राबन, हिवरा, टोणगाव, लाडगाव, करमाड, शरणापूर, वंजारवाडी, चौका, शेकटा.