छत्रपती संभाजीनगर : शहर पाणीपुरवठा योजनेचे काम १०० टक्के पूर्ण होण्यास डिसेंबर २०२६ उजाडणार आहे. त्यामुळे सध्याच्या १२००, ७०० व ९०० मि.मी. जलवाहिन्यांवरच शहराची तहान भागवावी लागेल. अलीकडच्या काळात ९०० मि.मी.ची जलवाहिनी २०० कोटींतून टाकण्यात आली असली तरी त्यातून ७५ ऐवजी फक्त २६ एमएलडी पाणी वाढणार असल्याने पाणीपुरवठ्यातील तांत्रिक अडचणी, वाढलेली लोकसंख्या, क्षमतेपेक्षा जास्त मागणीमुळे शहरात पाणीबाणीचे चित्र पुढील दीड ते दोन वर्षे कायम राहील.
विभागीय आयुक्त दिलीप गावडे यांनी पाणीपुरवठा वितरणातील त्रुटी आणि योजनेतील कामांवर महाराष्ट्र जीवन प्राधिकरण, महापालिकेच्या वरिष्ठ अधिकाऱ्यांच्या उपस्थितीत मंगळवारी पत्रकारांशी चर्चा करीत वस्तुस्थिती समोर आणली. यावेळी मनपा अतिरिक्त आयुक्त रणजित पाटील, प्राधिकरणाच्या मुख्य अभियंता मनीषा पलांडे, मनपाचे अभियंता एम. एम. काजी, के. एम. फालक यांची उपस्थिती होती.
पत्रकारांनी प्रशासनास केलेले प्रश्नपत्रकार : नागरिकांना रोज पाणीपुरवठा दोन वर्षांनी तरी होईल काय?प्रशासन : सध्या तसे सांगता येणार नाही.
पत्रकार : राजकीय हस्तक्षेपामुळे विलंब होतोय का?प्रशासन : राजकीय दबाव नाही.
पत्रकार : पाच दिवसांत ६५० एमएलडी पाणी जाते कुठे?प्रशासन : नेटवर्क वाढले आहे, साठवण जलकुंभ नाही.
पत्रकार : मनपा, एमजीपीच्या तांत्रिक वादाचा भडका उडतोय का?प्रशासन : नाही, मनपा तांत्रिक एक्सपर्ट नाही, एमजेपी एक्सपर्ट आहे.
पत्रकार : एमजीपी मुख्य अभियंत्यांमुळे वाद वाढत आहे काय?प्रशासन : नाही, तसे काहीही नाही.
पत्रकार : मनपात प्रशासकीय राजवटीमुळे सर्व आलबेल आहे?प्रशासन : मनपात लोकप्रतिनिधी असते तर सर्व संतुलित राहिले असते.
मनपात, प्राधिकरणात वाद नाही९०० मि.मी. योजनेतून २६ एमएलडी पाणी वाढेल. ती पूर्ण क्षमतेने सुरू करण्यासाठी शटडाऊन घेऊन पंपहाऊसचे काम करावे लागेल. नवीन याेजनेचा कंत्राटदार बदलणे शक्य नाही. दंड आकारणे, नोटीस देणे, दुसरा कंत्राटदार शोधणे या बाबी कागदावर छान वाटतात. परंतु, वस्तुस्थितीला धरून नाहीत. विद्यमान कंत्राटदार योजनेच्या कामास तयार आहे. निधीची अडचण नाही. कंत्राटदाराने योजनेच्या रोडमॅपमध्ये डिसेंबर २०२६ पर्यंत काम होईल, असे सांगितल्याचे मुख्य अभियंता पलांडे यांनी सांगितले.
मनपा सत्ताधाऱ्यांनी १२० कि. मी. नेटवर्क वाढविले२०१५ ते २०२० पर्यंतच्या मनपा सत्ताधाऱ्यांनी नो नेटवर्क एरियामध्ये १२० कि.मी. जलवाहिन्या टाकल्या. त्यावरील नळकनेक्शन रेकॉर्डवर नाही. रोजी पाणी देण्यासाठी वितरण व्यवस्था सक्षम नाही. २०२२ ते २४ पर्यंत ५ दिवसांआड पाणीपुरवठा झाला. २५०० मि.मी. जलवाहिनी योजनेच्या कामामुळे १२०० व ७०० मि.मी.च्या जलवाहिन्या वारंवार फुटत आहेत. परिणामी, पाणीपुरवठ्यात खंड पडत आहे. ८५ टक्के वसाहतींना पाणीपुरवठा होत असून, १५ टक्के भागांत अडचण आहे. ९०० मि.मी.च्या नवीन जलवाहिनीतून ७५ एमएलडी पाणी मिळाले तर समस्या सुटेल, असे मत मनपाचे अभियंता काजी यांनी मांडले.
सध्या किती पाणीपुरवठा होतो?सध्या १ लाख २८ हजार नळकनेक्शन आहेत. १३० एमएलडी पाणी रोज मिळते. २८० एमएलडी पाण्याची गरज आहे. ९०० मि.मी. नवीन जलवाहिनीचे डब्ल्यूटीपीचे बांधकाम बाकी आहे. ७०० मि.मी.ची जुनी जलवाहिनी बंद करून ९०० मि.मी.ची सुरू करावी लागेल. त्यामुळे शहराला १२०० व ९०० मि.मी. जलवाहिनीतून १४० एमएलडीच पाणी मिळेल. ९०० मि.मी. जलवाहिनीचे पंप बसविण्यासाठी ७०० मि.मी.वरील तांत्रिक यंत्रणा वापरण्यासाठी शटडाऊन घ्यावे लागेल. शटडाऊन घेणे सध्या शक्य नाही.