इस्लामचा दहशतवादाशी संबंध नाही - कमरूजमा आजमी

 जालना : दहशतवादामुळे मुस्लिम समाजसुद्धा प्रचंड त्रस्त असून दहशतवादाचा इस्लाम धर्माशी काहीही संबंध नाही. काही लोक राजकीय फायद्यासाठी दहशतवादाशी इस्लामचा संबंध जोडत असल्याचा आरोप जागतिक इस्लामी मिशनचे सचिव मौलाना कमरूजमा आजमी यांनी केला. येथील राजाबाग सवार दर्गा उरूस निमित्त प्रवचनासाठी आजमी मंगळवारी जालना येथे आले होते. पत्रकारांशी बोलताना ते पुढे म्हणाले की, मुस्लिम देशांमध्ये काही लोक दहशतवादाचा आधार घेऊन राजकीय हेतू साध्य करण्याचा प्रयत्न करीत आहेत. त्यांना अमेरिका मदत करीत असल्याचा आरोपही आजमी यांनी केला. दहशतवाद वाढण्याचे कारण शोधले पाहिजे, असे सांगून आजमी म्हणाले की, इस्लामची शिकवण शांतता, बंधुभाव, मानवता ही आहे. त्याचा प्रचार व प्रसार आंतरराष्ट्रीय पातळीवर करण्याचा आपला उद्देश आहे. आपल्या या कामाची दखल इंग्लंडचे पंतप्रधान डेव्हीड कॅमरेन यांनी घेतली. जागतिक पातळीवरील दहशतवादाबाबत त्यांनी आपल्यासमवेत चर्चा केली, असे आजमी यांनी सांगितले. देशात मुस्लिम समाजाला भाजपाची विशेषत: नरेंद्र मोदींची भीती घातली जात आहे, याविषयी आजमी म्हणाले, मुस्लिम समाजाने भाजपाची किंवा मोदींची भीती बाळगण्याचे कारण नाही. देशात लोकशाही आहे. जगभरात सर्वाधिक लोकशाहीचे अधिकार भारतातच आहेत, असेही ते म्हणाले. भारतीय लोकशाहीची त्यांनी प्रशंसा केली. भारतातील मुस्लिम समाजाला योग्य दिशा देण्यासाठी अराजकीय संघटनेची गरज आहे. समाजातील युवकांनी त्या दिशेने पावले उचलावीत, असे आवाहनही आजमी यांनी केले. यावेळी सय्यद जमील रजवी, फेरोज बागवान आदी उपस्थित होते. (प्रतिनिधी)