पार्सलच्या नावाखाली गुटख्याची आयात

औरंगाबाद : परराज्यांतून चक्क ट्रॅव्हल्स बसमधून औरंगाबाद शहरात पार्सलच्या नावाखाली गुटखा आयात करण्यात येत असल्याचे सोमवारी क्रांतीचौक पोलिसांनी केलेल्या कारवाईतून उघडकीस आले.

औरंगाबाद : राज्यात गुटखा बंदी आहे. अशा परिस्थितीत परराज्यांतून चक्क ट्रॅव्हल्स बसमधून औरंगाबाद शहरात पार्सलच्या नावाखाली गुटखा आयात करण्यात येत असल्याचे सोमवारी क्रांतीचौक पोलिसांनी केलेल्या कारवाईतून उघडकीस आले. मध्य प्रदेशातील इंदौर येथून शहरातील मनमंदिर ट्रॅव्हल्समधून आणण्यात आलेले तब्बल अडीच लाखांच्या गुटख्याचे पार्सल क्रांतीचौक पोलिसांनी गुरुवारी पकडले.
बसमधून पार्सल उतरवून ते शहरात विक्रीसाठी पोहोचते करणाऱ्या ज्ञानेश्वर साहेबराव टेकाळे (रा. अंगुरीबाग) व मनोज ईश्वरलाल खंडेलवाल (रा. जवाहर कॉलनी) या दोघांना क्रांतीचौक पोलिसांनी अटक केली. हे दोघे मनमंदिर ट्रॅव्हल्सचे कर्मचारी असल्याचे पोलिसांनी सांगितले.
या कारवाईबाबत माहिती देताना पोलीस निरीक्षक गोवर्धन कोळेकर म्हणाले, शहरात गेल्या काही महिन्यांपासून ट्रॅव्हल्स बसमधून गुटखा आणण्यात येत असल्याची पोलिसांकडे माहिती होती. आज दुपारी जालना रोडवरील मनमंदिर ट्रॅव्हल्सच्या एका बसमधून पार्सलमध्ये गुटख्याचा मोठा साठा आणण्यात आला आहे, अशी पक्की खबर पोलिसांना मिळाली.
माहिती मिळताच पोलीस निरीक्षक कोळेकर यांच्या मार्गदर्शनाखाली पोलीस कर्मचारी समद पठाण, प्रकाश डोंगरे, सुनील जाधव, सतीश साळवे, मुनीर पठाण यांनी अन्न व औषधी विभागाचे अधिकारी गोपाल कासार यांच्यासह मनमंदिर ट्रॅव्हल्स गाठले. त्यावेळी ट्रॅव्हल्सच्या बसमधून आलेले पार्सल ट्रॅव्हल्सच्याच एका रिक्षात भरून ते घेऊन आरोपी ज्ञानेश्वर व मनोज निघालेले पोलिसांच्या नजरेस पडले. संशय आल्याने पोलिसांनी एमएच-२० एटी- ५१८० या क्रमांकाची रिक्षा अडविली. त्यात पार्सलचे बॉक्स भरलेले होते. पोलिसांनी या बॉक्सबाबत विचारणा केली असता त्यात एका जणाचे काही तरी पार्सल आहे, असे ज्ञानेश्वर आणि मनोजने सांगितले. शेवटी पोलिसांनी ते बॉक्स फोडले. तेव्हा या सर्व बॉक्समध्ये विविध कंपन्यांचा गुटखा आढळून आला. या सर्व बॉक्समध्ये एकूण २ लाख ५३ हजार रुपये किमतीचा गुटखा असल्याचे आढळून आले. तो सर्व माल पोलिसांनी जप्त केला आणि आरोपी ज्ञानेश्वर व मनोज या दोघांना अटक करण्यात आली. त्यांच्या ताब्यातील रिक्षाही जप्त करण्यात आली. ही रिक्षा मनमंदिर ट्रॅव्हल्सचीच असल्याचे पोलीस निरीक्षक कोळेकर यांनी सांगितले.
इंदौरहून आणण्यात येत होता गुटखा
महाराष्ट्रात गुटखा बंदी आहे. आसपासच्या काही राज्यांमध्ये अद्याप बंदी नाही. त्यामुळे परराज्यांतून रेल्वे, ट्रॅव्हल्समधून अशा पद्धतीने गुटखा आणल्या जातो आणि तो दामदुप्पट दराने विकल्या जातो.
क्रांतीचौक पोलिसांनी पकडलेला हा अडीच लाखांचा गुटखाही मध्य प्रदेशातील इंदौर शहरातून आणण्यात आल्याचे उघडकीस आले आहे.
४गुटख्याचे हे पार्सल कुणी मागविले होते आणि कुणासाठी, याचा तपास करण्यात येत असल्याचे पोलीस निरीक्षक कोळेकर यांनी सांगितले.