रुग्ण म्हणून गेले अन् पिस्तूल दाखवून डॉक्टरांनाच लुटले

औरंगाबाद : औरंगाबादेतील तीन गुन्हेगारांनी दमण या केंद्रशासित प्रदेशात जाऊन दोन महिला डॉक्टरांना पिस्तुलाचा धाक दाखवून लुटल्याची घटना समोर आली आहे. आजारी असल्याचा बहाणा करून या आरोपींनी दवाखान्यात घुसून तेथील दोन महिला डॉक्टरांना पिस्तुलाचा धाक दाखवून बांधून ठेवून ६५ हजारांचा ऐवज लुटला होता. या टोळीतील तिन्ही आरोपींना दमण पोलिसांनी शुक्रवारी येथील गुन्हे शाखेच्या मदतीने अटक केली.
अरमान खान ऊर्फ नदीम मुजीब खान (२०, रा. शंभुनगर, गारखेडा), रेहान खान रशीद खान (२२, रा. गादिया विहार परिसर, गारखेडा) व आशू ऊर्फ आतिक रजाक शाह (२४, रा. काबरानगर, गारखेडा) अशी आरोपींची नावे आहेत. त्यांना अटक करून दमणला नेण्यात आले.
२३ जुलै रोजी दमण येथे हा गुन्हा घडला होता. घटनास्थळी सापडलेल्या काही पुराव्यावरून दोन्ही महिला डॉक्टरांना औरंगाबादेतील तीन आरोपींनी लुटल्याचे निष्पन्न झाले. मग दमण पोलिसांनी औरंगाबाद गुन्हे शाखेचे निरीक्षक अविनाश आघाव यांच्याशी संपर्क साधून आरोपींबाबत माहिती दिली.
आरोपी नेमके कोण आहेत, कोठे राहतात, याची गुन्हे शाखा पोलिसांनी माहिती काढली. तपासासाठी दमण पोलिसांचे पथकही औरंगाबादेत काल रात्री दाखल झाले. आज सकाळीच गुन्हे शाखेचे निरीक्षक आघाव व त्यांच्या सहकाऱ्यांनी गारखेडा परिसरात छापे मारून वरील तिन्ही आरोपींना अटक केली.