गंगाखेड विधानसभेत सर्वाधिक मते

उद्धव चाटे, गंगाखेड विधानसभा मतदार संघातून ओबीसी मतदारांनी आ. बंडू जाधव यांना भरभरून मताधिक्य देऊन शिवसेनेची आघाडी वाढविण्यासाठी सहकार्य केले.

 उद्धव चाटे, गंगाखेड गंगाखेड विधानसभा मतदार संघातून ओबीसी मतदारांनी परभणी लोकसभा मतदार संघाचे उमेदवार आ. बंडू जाधव यांना भरभरून मताधिक्य देऊन शिवसेनेची या मतदार संघातील आघाडी वाढविण्यासाठी सहकार्य केले. या मतदार संघातील जनता लोकसभेचे उपनेते खा. गोपीनाथ मुंडे व शिवसेना पक्षप्रमुख उद्धव ठाकरे यांच्यासोबत असल्याचे आपल्या मतदानातून दाखवून दिले. पंतप्रधान पदाचे उमेदवार नरेंद्र मोदी यांची पंतप्रधानपदी वर्णी लागावी यासाठी मतदारांनी एकवटून मतदान केले. गंगाखेड विधानसभा मतदार संघात युतीला नेहमीच भरभरून मते मिळतात. याहीवेळी मतदारांनी आपले मत हे निर्णायक ठरविले. गंगाखेड तालुका हा अर्धाअधिक डोंगराळ भाग असून ओबीसी मतदारांची संख्या अधिक आहे. या मतदार संघातून नेहमीच मताधिक्य मिळते. परंतु निवडून येणारे युतीचे खासदार या भागाकडे लक्ष देत नाहीत. यावेळी मात्र आ. बंडू जाधव यांना निर्णायक मते देऊन विकासाच्या अपेक्षा मतदारांनी बाळगल्या आहेत. कॉँग्रेस व राष्टÑवादी कॉँग्रेसचे उमेदवार विजय भांबळे व महायुतीचे उमेदवार आ. बंडू उर्फ संजय जाधव या दोघातच खर्‍या अर्थाने लढत झाली. गंगाखेड या मतदार संघात महायुतीचे खा. गोपीनाथ मुंडे, शिवसेना पक्षप्रमुख उद्धव ठाकरे यांना मानणारा गट मोठा आहे. म्हणून गंगाखेड विधानसभा मतदार संघातून महायुतीच्या उमेदवाराला मताधिक्य मिळाले. तसेच महायुतीचे सदस्य व कार्यकर्त्यांनी प्रामाणिकपणे परिश्रम घेऊन गंगाखेड विधानसभा मतदार संघातून मोठे मताधिक्य दिले. गंगाखेड मतदार संघातील ५४ हजारांचे मताधिक्य मिळविण्यासाठी प्रयत्न केले. एका गावात चार ते पाच वेळेस भेटी दिल्या. हा विजय आमचा नसून जनतेचा विजय आहे. त्यांनी एवढ्या मोठ्या प्रमाणात मताधिक्य देऊन जिल्ह्यातील शिवसेनेचा वाघ मतदारांनी दिल्लीत पाठविला आहे, अशी प्रतिक्रिया शिवसेना तालुकाप्रमुख विष्णू मुरकुटे आणि भाजयुमोचे जिल्हाध्यक्ष श्रीनिवास मुंडे यांनी लोकमतशी बोलताना व्यक्त केली.