छत्रपती संभाजीनगरात भर वस्तीत 'गँग वॉर'ची धडकी; कुख्यात गुन्हेगाराचा गोळीबार

मिरवणुकीत गुन्हेगाराचे फोटो झळकल्याच्या कारणावरून वर्चस्ववाद आला उफाळून

छत्रपती संभाजीनगर : शहरात पुन्हा दोन कुख्यात गुन्हेगारांमध्ये ‘गँग वाॅर’ उफाळून आले. दोन दिवसांपासून वर्चस्ववादातून धुमसत असलेल्या वादानंतर गुरुवारी रात्री ९ वाजता पवन अनिल दिवेकर (३०) याने हनुमाननगरमध्ये रात्री ९ वाजता गोळीबार करीत पोलिसांना आव्हान दिले. सात दिवसांपासून शहरात सुरू असलेल्या गुन्ह्यांच्या सत्रामुळे शहर हादरून तर गेलेच. मात्र, पोलिसांचा गुन्हेगारांवरचा धाक संपल्याचे पुन्हा एकदा अधोरेखित झाले. रात्री उशिरापर्यंत पवन दिवेकर, त्याचा विरोधक सुरेश रांजणे याचा शोध सुरू होता.

दिवेकर व रांजणे यांच्यामध्ये काही दिवसांपासून वर्चस्ववादातून वाद सुरू होता. बुधवारी सायंकाळी हनुमाननगर, तर गुरुवारी दुपारी न्यायनगरमध्ये या टोळ्या आमनेसामने आल्या होत्या. रात्री ९ वाजेच्या सुमारास पवन दिवेकर, त्याचा नातलग साळवे व अन्य टवाळखोर हनुमाननगरमध्ये उभे असताना तेथे रांजणे गेला. त्यांच्यात बाचाबाची होऊन धक्काबुक्की झाली. त्यातच दिवेकरने पिस्तूलद्वारे थेट हवेत गोळी झाडली. पोलिसांच्या दाव्यानुसार, त्याने एक गोळी झाडली. त्याचे काडतूस घटनास्थळी मिळून आले, तर प्रत्यक्षदर्शींच्या दाव्यानुसार, पवनने जवळपास तीन वेळा गोळी झाडत दहशत निर्माण केली. घटनेनंतर परिसरात एकच हल्लकल्लोळ उडाला. नागरिक सैरावैरा पळाले. काही क्षणांत दुकाने बंद झाली. पुंडलिकनगर पोलिसांसह वरिष्ठ पोलिस अधिकाऱ्यांनी घटनास्थळी धाव घेतली. दंगा काबू पथकही तैनात करण्यात आले. घटनेनंतर साळवेला ताब्यात घेतले, तर दिवेकर, रांजणे पसार झाले.

मिरवणुकीत फोटो झळकल्यावरून वाद
कुख्यात गुन्हेगार दिवेकर १४ एप्रिल रोजी मिरवणुकीत सहभागी झाला होता. तेव्हा त्याच्या साथीदारांनी त्याच्या छायाचित्रासह मिरवणुकीत नाच केला. त्यावरून पुंडलिकनगर, हनुमाननगर, न्यायनगर, भरतनगरमधील गुंडांचा वर्चस्ववाद उफाळून आला. गुरुवारच्या गोळीबाराला याच वादाची किनार असल्याचे सांगितले जात आहे. विशेष म्हणजे, घटनास्थळी असलेल्या दोन टपऱ्यांवर व्याजाने पैसे देणारे, रेकॉर्डवरील गुन्हेगारांची नेहमी ऊठबस असते. या सर्व टपऱ्या अवैध असताना त्यांच्यावर कारवाई होत नाही.

पीडी कंपनी नावाने टोळी चालवतो
दिवेकरवर यापूर्वी छत्रपती संभाजीनगरसह जालन्यात हत्या, हत्येचा प्रयत्न यासारखे ८ गंभीर गुन्हे आहेत. २०२३ पासून एका खुनाच्या गुन्ह्यात पसार दिवेकरला ३ फेब्रुवारी, २०२५ रोजी गुन्हे शाखेने अटक केली होती. मार्चअखेर तो जामिनावर सुटला. २०१९ मध्ये पुंडलिकनगरमधील एका खून प्रकरणात त्याने साडेतीन वर्षे तुरुंगवास भोगला आहे. ११ डिसेंबर २०२३ रोजी गजानन तौर हत्याकांडावेळी पवन तौरच्या कारमध्ये उपस्थित होता. दोन दिवसांपूर्वी त्याने तौर हत्याकांडाचा बदला घेणार असल्याचे स्टेटस ठेवले होते. तो पीडी नावाने टोळी चालवतो. मात्र, पोलिसांना याविषयी कुठलेच गांभीर्य नसल्याचे वारंवार समोर आले.