फूडपार्कच्या प्रस्तावाला मुहूर्त लागेना

औरंगाबाद : वर्षभरापासून ‘डीएमआयसी’च्या बिडकीन इंडस्ट्रिअल पार्कमध्ये ‘फूडपार्क’ उभारण्याच्या केवळ घोषणाच केल्या जात आहेत. आता ‘औरंगाबाद इंडस्ट्रिअल टाऊनशिप लिमिटेड’च्या (एआयटीएल) संचालक मंडळाची बैठक फेब्रुवारीच्या तिसऱ्या आठवड्यात होणार असून, त्या बैठकीसमोर ‘फूडपार्क’चे ‘ले-आऊट, डिझायनिंग, इस्टिमेट व टेंडर’चा खर्च आदींचा प्रकल्प अहवाल सादर केला जाणार आहे. त्यास संचालक मंडळाची मान्यता मिळाल्यानंतर मार्चअखेरपर्यंत नियोजित ‘फूडपार्क’च्या कामाला प्रत्यक्षात सुरुवात होण्याची शक्यता वर्तविली जात आहे.

‘मासिआ’च्या वतीने आयोजित ‘ॲडव्हाॅन्टेज महाराष्ट्र एक्स्पो- २०२०’च्या उद्‌घाटन समारंभासाठी मुख्यमंत्री उद्धव ठाकरे ९ जानेवारी २०२० रोजी औरंगाबादेत आले होते. त्यावेळी त्यांनी बिडकीन इंडस्ट्रिअल पार्कमध्ये ५०० एकरांत अन्नप्रक्रिया उद्योग (फूडपार्क) उभारण्याची घोषणा केली होती. त्यानंतर डिसेंबरच्या पहिल्या आठवड्यात ‘एआयटीएल’ संचालक मंडळाच्या बैठकीत ‘फूडपार्क’च्या प्रस्तावास मंजुरी मिळाली. बिडकीन इंडस्ट्रिअल पार्कमध्ये सर्व पायाभूत सुविधा तयार आहेत. तरीही त्याठिकाणी अद्याप एकही ‘अँकर’ प्रोजेक्ट आलेला नाही. किमान ‘फूडपार्क’ला सुरुवात झाली, तर देश किंवा विदेशातील मोठे उद्योग त्याठिकाणी गुंतवणूक करण्यासाठी पुढे येऊ शकतील, असे उद्योगक्षेत्रातील जाणकारांचे मत आहे. मात्र, बैठका, घोषणा आणि पाहणी यापलीकडे बिडकीन इंडस्ट्रिअल पार्कच्या विकासासाठी शासन -प्रशासन यंत्रणेच्या हालचाली नाहीत.

डिसेंबर २०२० च्या पहिल्या आठवड्यात ‘एआयटीएल’ संचालक मंडळाची बैठक झाली. त्या बैठकीत ‘फूडपार्क’ उभारण्यासाठी एकमताने मंजुरी मिळाली. त्यावेळी डिसेंबर अखेरपर्यंत प्रकल्प अहवाल सादर करण्याचे निश्चितही झाले होते. आता जानेवारी महिना उलटत आला, तरीही या विषयावर ‘एआयटीएल’ची बैठक झालेली नाही. ‘एआयटीएल’च्या बैठकीत प्रकल्प अहवाल मंजूर झाल्यानंतरच ‘फूडपार्क’मध्ये येणाऱ्या उद्योगांसाठी रस्ते, वीज, पाणी, वेस्ट वॉटर प्रोसेसिंग युनिट उभारणीला कधी मुहूर्त सापडणार.

चौकट..............................

प्रकल्प अहवालाच्या मंजुरीनंतरच पुढचा टप्पा

यासंदर्भात ‘ऑरिक’चे सहव्यवस्थापकीय संचालक संजय काटकर यांनी सांगितले की, ‘एआयटीएल’च्या बैठकीत डिसेंबरमध्ये फूडपार्कला मंजुरी मिळाली. जानेवारीमध्ये बैठक झाली असती, तर आम्ही त्या बैठकीसमोर फूडपार्कचा प्रकल्प अहवाल सादर केला असता. फेब्रुवारीच्या तिसऱ्या आठवड्यात बैठक होण्याची शक्यता आहे. त्या बैठकीत प्रकल्प अहवालास मान्यता मिळाल्यानंतर मार्चअखेरपूर्वी यासंबंधीच्या पुढील टप्प्याला (कामाला) सुरुवात होऊ शकते.