अखेर अतिक्रमणावर ग्रामपंचायतचा हातोडा

शिरूरकासार: शहरात अनेकांनी रस्त्यालगत अतिक्रमण केले होते. यामुळे रहदारीस अडथळा येत होतो. शिवाय गेल्या काही दिवसात शहरात येणारी बसही येईनाशी झाली होती. यामुळे ग्रामपंचायतने ठराव घेऊन शुक्रवारी अतिक्रमणावर हातोडा चालविला. येथील पोलीस स्टेशन ते बाजार तळापर्यंतच्या रस्त्यावर अनेकांनी अतिक्रमण केले होते. अतिक्रमणे दिवसेंदिवस रस्त्यावर पुढे-पुढे येऊ लागल्याने शहरात येणारी बसही बंद करण्याचा निर्णय महामंडळाने घेतला होता. परिणामी प्रवाशांना पायी चालत बसपर्यंत ये-जा करावी लागत होती. येथील बसस्थानक शहरापासून दूर अंतरावर आहे. यामुळे रात्रीच्यावेळी बसस्थानकापासून शहरात प्रवाशांना पायी चालत यावे लागत असे. याचा महिला, वृद्ध यांना मोठा त्रास होत होता. अतिक्रमण दूर केल्याशिवाय बस शहरात येणार नाही, ही बाब ग्रामसभेत समोर आली होती. यावेळी अतिक्रमण हटविण्याचा निर्णयही ग्रामसभेत घेण्यात आला होता. यानंतर स्वत:हून अतिक्रमण हटविण्यास ग्रामस्थांना मुदतही देण्यात आली होती. यासंदर्भात ग्रामस्थांनी नोटीसही दिली होती. यानंतर काही नागरिकांनी आपले अतिक्रमण स्वत:हून काढून घेतले. मात्र, काही नागरिकांनी ग्रामपंचायतच्या नोटिसीला न जुमानता अतिक्रमण तसेच ठेवले. ज्यांनी अतिक्रमण काढले नाही, त्यांच्या अतिक्रमणावर ग्रामपंचायतने शुक्रवारी बुलडोजर चालविला. ग्रामपंचायतने अनेकांची अतिक्रमणे जेसीबीच्या सहाय्याने तोडल्याने यावेळी ग्रामस्थांनी तत्कालीन जिल्हाधिकारी सुनील केंद्रेकर यांची आठवण काढली. अतिक्रमण काढताना ग्रामविकास अधिकारी मधुकर चोपडे, सरपंच, उपसरपंच तसेच ग्रामपंचायतचे सर्व सदस्य, ग्रामस्थ मोठ्या संख्येने उपस्थित होते. अतिक्रमण काढण्यास काहींचा विरोध होता. यावर त्यांना अतिक्रमण हटविणे व्यावसायिकदृष्ट्या कसे महत्त्वाचे आहे, हे समजावून सांगितले. यानंतर अतिक्रमण हटाव मोहीम जोरदारपणे राबविण्यात आली. यावेळी कायदा व सुव्यवस्थेचा प्रश्न निर्माण होऊ नये, यासाठी पोलीस बंदोबस्तही ठेवण्यात आला होता. यानंतर पुन्हा अतिक्रमण होणार नाही, याची दक्षता घेणार असल्याचेही चोपडे म्हणाले. (वार्ताहर)