सिडकोत पुन्हा पाणीटंचाई तीव्र

औरंगाबाद : सिडको- हडकोतील वसाहतींचा पाणीपुरवठा पुन्हा कोलमडला आहे. काल ८ जून रोजीचा पाणीपुरवठा ९ जूनच्या दुपारपर्यंत सुरळीत झालेला नव्हता. त्यामुळे संतप्त नगरसेवकांनी पालिकेच्या अभियंत्यांना विचारणा केली. सिडको- हडकोसाठी टाकण्यात आलेल्या एक्स्प्रेस जलवाहिनीवर ६ ठिकाणी बायपास आहे.
मागील दीड महिन्यापासून सातत्याने सिडको- हडकोतील २२ वॉर्डांचा पाणीपुरवठा कोलमडतो आहे. त्यामागील कारणे शोधण्याऐवजी मनपा सत्ताधारी व अधिकारी बैठकींच्या सत्रात जुंपले आहेत.
पाण्याची गळती, चोरी, महावितरणचा लपंडाव, अशी काही कारणे सांगून मागील महिन्यापासून पालिका वेळकाढू धोरण अवलंबित आहे. मात्र, शहरातील पाणीपुरवठा सुरळीत होत नाही. नगरसेविका ऊर्मिला चित्ते यांनी आठ तासांच्या गॅपने पाणीपुरवठा होत असल्याचा आरोप केला. यांत्रिकी विभागाचे उपअभियंता यू.जी. शिरसाठ म्हणाले की, आज महावितरणकडून काहीही अडचण आली नाही. सुरळीत पाणीपुरवठा झालेला आहे.
सहा ठिकाणी राजकीय बायपास
एक्स्प्रेस जलवाहिनी सिडको- हडकोसाठी टाकण्यात आली असली तरी तिला सहा ठिकाणी बायपास करण्यात आले आहे. सूतगिरणी, गजानन महाराज मंदिर, सेव्हन हिल जलकुंभ, मरीमाता, शिवाजीनगर या ठिकाणांहून त्या जलवाहिनीतील पाणी दुसरीकडे पुरविले जाते. वसाहती वाढल्यामुळे राजकीय बायपास करून पाणी वळविले गेले. त्यामुळे सिडको- हडकोला पाणी कमी पडत असल्याचा आरोप होत आहे.
शिक्षणमंत्र्यांकडून कानउघाडणी
शिक्षणमंत्री राजेंद्र दर्डा यांनी आज मनपा आयुक्त डॉ. हर्षदीप कांबळे आणि शहर अभियंता एस.डी. पानझडे यांची पाणीपुरवठ्यावरून जोरदार कानउघाडणी केली. ३ दिवसांत पाणीपुरवठा सुरळीत होईल, असा शब्द डॉ. कांबळे, पानझडे यांनी शिक्षणमंत्र्यांना दिला. काही वॉर्डांमध्ये भरमसाट पाणीपुरवठा होतो आहे, तर कुठे पाण्यासाठी आठ-आठ दिवस वाट पाहावी लागत आहे. ‘जिसकी लाठी, उसकी भैस’ अशा पद्धतीने मनपाचा कारभार सुरू आहे. रोशनगेट, जिन्सी, गारखेडा, सिडको- हडको या वसाहतींमध्येच अडचणी निर्माण का होत आहेत, महावितरणचे कारण सांगितले जात आहे, अचानक अडचणी येण्यामागचे कारण काय? असा सवालही शिक्षणमंत्री राजेंद्र दर्डा यांनी शहर अभियंत्यांना केला.
एक्स्प्रेस जलवाहिनीच्या हेतूला ‘छेद’
२००१ साली सिडको- हडकोतील सुमारे २५ हजार नळधारकांसाठी १,२०० मि.मी. व्यासाची एक्स्प्रेस जलवाहिनी टाकण्यात आली. ती जलवाहिनी सिडकोतील वाढत्या लोकसंख्येला समोर ठेवून टाकण्यात आली होती. त्या जलवाहिनीचे पाणी सध्या कमी पडते आहे.
२२ वॉर्डांतील लोकसंख्या १४ वर्षांत मोठ्या प्रमाणात वाढल्याने सिडको- हडकोची तहान वाढली आहे. पालिकेकडे आहे तीच यंत्रणा असल्यामुळे हा सगळा त्रास होत असल्याचे दिसते.