बसस्थानकातील फुकट्या पोस्टरबाजांना बसणार चाप!

नांदेड: शहरातील जवळपास सर्वच चौक बॅनर आणि पोस्टरने विदू्रप झाले आहेत़ त्यात बसस्थानकातही ठिकठिकाणी विनापरवानगी पोस्टर आणि बॅनर लावण्यात येतात़ त्यामुळे बसस्थानकाचे मोठ्या प्रमाणात विद्रूपीकरण झाले आहे़ अशा फुकट्या पोस्टरबाजांना चाप बसविण्यासाठी आता एसटी प्रशासनाने पावले उचलली आहेत़ जयंती, पुण्यतिथी, नेत्यांचे वाढदिवस किंवा उत्पादनाच्या प्रसिद्धीसाठी सध्या दिसली मोकळी जागा की लाव बॅनर, पोस्टर असा प्रकार नांदेडात सर्रासपणे पहावयास मिळतो़ शहरात बॅनर लावण्यासाठी मनपाकडून परवानगी घेणे आवश्यक असते़ परंतु फुकट्या प्रसिद्धीची चटक लागलेल्यांना त्याच्याशी काहीएक देणे-घेणे नसल्याचेच दिसत आहे़ त्यामुळे शहरातील सर्वच रस्ते, चौक विद्रूप झाले आहेत़ त्याला बसस्थानकही कसे अपवाद राहील! बसस्थानक प्रवेशद्वारापासूनच पोस्टर आणि भिंती रंगविलेल्या पहावयास मिळतात़ आगारप्रमुखाच्या कक्षाबाहेर, चौकशी कक्ष, पोलिस चौकी, बसण्याच्या जागा, बसेसमध्ये आतून अन् बाहेरुन विशेष म्हणजे लघूशंकागृहही या जाहिरातबाजांनी सोडले नाही़ खड्डयामुळे अगोदरच बकाल दिसत असलेले बसस्थानक पोस्टरबाजीमुळे आणखीच ओंगळवाणे झाले़ या प्रकाराला चाप लावण्यासाठी आता विभाग नियंत्रक बी़डब्ल्यू. घुले व आगारप्रमुख संजय वाळवे, बी़ एच़ मोरे, सचिन चव्हाण यांनी पावले उचलली आहेत़ सार्वजनिक मालमत्तेचे विदू्रपीकरण केल्याप्रकरणी गुन्हा नोंदविण्याची तयारी केली आहे़ कारवाईमुळे फुकट्या पोस्टरबाजांना काही प्रमाणात का होईना, परंतु चाप बसण्याची आशा निर्माण झाली आहे़ त्याचबरोबर आॅटो आणि खाजगी वाहतुकीला आळा घालण्यासाठी पोलिसांशी चर्चा करण्यात येणार आहे़ (प्रतिनिधी)