"आरोप म्हणजे शिक्षा नव्हे!" निदा खान प्रकरणात असदुद्दीन ओवेसींची एंट्री, विरोधकांना सुनावले

"आमचा न्यायालयावर विश्वास!" असदुद्दीन ओवेसी यांनी एमआयएमला टार्गेट करणाऱ्यांना सुनावले खडे बोल.

छत्रपती संभाजीनगर: नाशिक येथील टीसीएस कंपनीतील कथित धर्मांतर आणि लैंगिक शोषण प्रकरणातील आरोपी निदा खान हिला छत्रपती संभाजीनगरमधून अटक झाल्यानंतर राजकीय आरोप-प्रत्यारोपांना उधाण आले आहे. एमआयएमचे प्रमुख असदुद्दीन ओवेसी यांनी या प्रकरणात उडी घेत, पक्षावर होणारे सर्व आरोप फेटाळून लावले आहेत. "निदा खानवरील आरोप कोर्टात टिकणार नाहीत आणि काही लोक केवळ मीडिया ट्रायल करत आहेत," असा घनाघाती आरोप ओवेसी यांनी केला.

संजय शिरसाटांच्या आरोपांना प्रत्युत्तर
काल शिंदेसेनेचे नेते संजय शिरसाट यांनी "निदा खानला एमआयएमच्या नगरसेवकांनी लपवून ठेवले होते आणि यात माजी खासदार इम्तियाज जलील यांची चौकशी झाली पाहिजे," असा खळबळजनक आरोप केला होता. यावर बोलताना ओवेसी म्हणाले की, "निदा खानला आमच्या नगरसेवकाने लपवले हे तुम्हाला कसे समजले? केवळ द्वेषपोटी एमआयएमला टार्गेट केले जात आहे. तुम्हाला जे करायचे आहे ते करा, आमचा न्यायालयावर पूर्ण विश्वास आहे."

"बुरखा घालणे बेकायदेशीर आहे का?"
ओवेसी यांनी यावेळी बुरख्याच्या मुद्द्यावरूनही सत्ताधाऱ्यांना धारेवर धरले. "एखाद्या महिलेने बुरखा घालणे कधीपासून बेकायदेशीर झाले?" असा सवाल त्यांनी उपस्थित केला. निदा खानची बदली एफआयआर दाखल होण्यापूर्वीच झाली होती, असा दावाही त्यांनी यावेळी केला. "आरोप झाले म्हणजे शिक्षा झाली असे होत नाही," असे म्हणत त्यांनी या प्रकरणातील 'मास्टरमाइंड'च्या थिअरीवर प्रश्नचिन्ह उपस्थित केले.

ओवेसींचे ५ रोखठोक सवाल:
१. निदा खानला एमआयएमने लपवले याचे पुरावे काय?
२. एखाद्या आरोपीची बाजू मांडणे किंवा कायदेशीर प्रक्रियेवर बोलणे म्हणजे गुन्हेगाराला पाठिंबा देणे आहे का?
३. केवळ एका समुदायाला किंवा पक्षाला टार्गेट करण्यासाठी ही 'मीडिया ट्रायल' सुरू आहे का?
४. बुरखा घालण्यावरून संशय व्यक्त करणे ही कोणती न्यायव्यवस्था आहे?
५. एफआयआरच्या आधीच बदली झाली असताना तिला फरार कसे म्हटले जात आहे?