मनपाच्या भर सभेत सत्ताधारी व काँग्रेसमध्ये राडा

By लोकमत न्यूज नेटवर्क | Published: July 30, 2021 05:00 AM2021-07-30T05:00:00+5:302021-07-30T05:00:52+5:30

ऑनलाईन सभेच्या नावाखाली बोलण्याची संधी नाकारल्याचा आरोप करून काँग्रेसच्या नगरसेवकांनी प्रश्न विचारल्याने सत्ताधारी भाजपचे पदाधिकारी व काँग्रेस सदस्यांमध्ये सभागृहातच जोरदार राडा झाला. संतापाने महापौरांनी नेमप्लेट भिरकावली तर स्थायी समितीचे सभापती आसनावरून खाली उतरून नगरसेवकाच्या अंगावर धावताच धक्काबुक्की होऊन सभागृहात प्रचंड गोंधळ उडाला. हा प्रकार गुरुवारी दुपारी १ वाजता चंद्रपूर मनपाच्या ऑनलाईन सभेत घडला.

Rada in the ruling party and Congress in the meeting of the corporation | मनपाच्या भर सभेत सत्ताधारी व काँग्रेसमध्ये राडा

मनपाच्या भर सभेत सत्ताधारी व काँग्रेसमध्ये राडा

Next
ठळक मुद्देसभागृहात धक्काबुक्की : सभापती नगरसेवकाच्या अंगावर धावले, महापाैर व नागरकरांची एकमेकांविरूद्ध पोलिसात तक्रार

लोकमत न्यूज नेटवर्क
चंद्रपूर : ऑनलाईन सभेच्या नावाखाली बोलण्याची संधी नाकारल्याचा आरोप करून काँग्रेसच्या नगरसेवकांनी प्रश्न विचारल्याने सत्ताधारी भाजपचे पदाधिकारी व काँग्रेस सदस्यांमध्ये सभागृहातच जोरदार राडा झाला. संतापाने महापौरांनी नेमप्लेट भिरकावली तर स्थायी समितीचे सभापती आसनावरून खाली उतरून नगरसेवकाच्या अंगावर धावताच धक्काबुक्की होऊन सभागृहात प्रचंड गोंधळ उडाला. हा प्रकार गुरुवारी दुपारी १ वाजता चंद्रपूर मनपाच्या ऑनलाईन सभेत घडला. सभागृहातील या अभूतपूर्व राड्याची चित्रफित समाज माध्यमांमध्ये झपाट्याने व्हायरल झाल्याने राजकीय क्षेत्रात चर्चेचा विषय झाला आहे.
कोविड १९ च्या पार्श्वभूमीवर चंद्रपूर मनपाच्या राणी हिराई सभागृहात गुरुवारी  ऑनलाईन सर्वसाधारण सभा आयोजित करण्यात आली होती. या सभेत २३ जून २०२१ झालेल्या ऑनलाईन सभेचे कार्यवृत्त वाचून मंजूर करणे, ६ मे व ३१ मे २०२१ रोजी घेण्यात आलेल्या स्थायी समितीच्या कार्यवृत्ताची माहिती देणे आणि मनपा शाळांतील विद्यार्थ्यांचे पालक कोविडने मृत्यू झाल्याने त्या कुटुंबाला सानुग्रह मदत देण्याच्या विषयावर चर्चा केली जाणार होती. दुपारी १ वाजता राष्ट्रगीताने सभेला सुरुवात झाली. यावेळी राणी हिराई सभागृहात महापौर राखी कंचर्लावार, उपमहापौर राहुल पावडे, स्थायी समितीचे सभापती रवी आसवानी, आयुक्त राजेश मोहिते व विषय समित्यांचे सभापती उपस्थित होते. कोविड प्रतिबंधामुळे काँग्रेसचे गटनेते डॉ. सुरेश महाकूलकर, नगरसेवक नंदू नागरकर,  सुनिता लोढीया,  अमजद अली, संगीता भोयर,  नीलेश खोब्रागडे,  सकीना अंसारी, वनिता खनके, अशोक नागापुरे यांनी ऑनलाईन सभेत सहभाग घेतला होता.

‘त्या’ नगरसेवकांना बडतर्फ करा
मनपाच्या आमसभेत धिंगाणा घालणाऱ्या मनसे व काँग्रेेसच्या नगरसेवकांना बडतर्फ करा,  अशी मागणी भाजप महानगर जिल्हाध्यक्ष डॉ. मंगेश गुलवाडे, संघटन महामंत्री राजेंद्र गांधी, महामंत्री सुभाष कासगोट्टूवार, ब्रिजभूषण पाझारे, रवींद्र गुरनुले, प्रकाश धारणे यांनी केली आहे.

सत्ताधारी म्हणतात...

मागण्यांचे निवेदन महापौरांना न देता काँग्रेसच्या नगरसेवकांनी  ऑनलाईन सभेत सभागृहात येऊन गोंधळ घातला. महापौर राखी कंचर्लावार यासुद्धा संयमाने प्रश्न मांडा, असे सांगत होत्या. मात्र,  काँग्रेसचे नगरसेवक नंदू नागरकर यांनी महापौरांच्या टेबलावर थाप मारली. हा प्रकार पाहून त्यांना समजाविण्यासाठी मी आसनावरून खाली उतरलो. कुणालाही धक्काबुक्की केली नाही. सभागृहात प्रश्न मांडण्याचा अधिकार आम्ही नाकारला नाही, असा दावा स्थायी समितीचे सभापती रवी आसवानी यांनी केला.

विरोधक म्हणतात...

कोविड प्रतिबंधामुळे ऑनलाईन सभेत काँग्रेसचे सर्व नगरसेवक सहभागी झाले होते. ही सभा आटोपल्यानंतर आयुक्त व महापौरांना महत्त्वाच्या तीन मागण्यांचे निवेदन सादर करणार होतो.  मात्र मागण्यांकडे दुर्लक्ष करून मनपा दोषींनाच अभय देत आहे. कोविडच्या नावाखाली  चर्चा टाळून मनमानी ठराव पारित करून घेत आहे. याला विरोध म्हणून सभागृहात प्रवेश करून प्रश्न विचारला. मात्र ,महापौर व स्थायी सभापतींनीच वाटेल ते बोलून राडा केला, असा आरोप काँग्रेसच्या नगरसेविका सुनिता लोढीया व नंदू नागरकर यांनी केला आहे.

महानगरपालिकेच्या सभागृहात नेमके काय घडले?

सभेला सुरुवात होताच मनसेचे नगरसेवक सचिन भोयर व समर्थकांनी अमृत योजनेवरून मनपाविरूद्ध घोषणाबाजी करीत थेट सभागृहातच प्रवेश केला.  हा प्रकार ऑनलाईन दिसताच संतापलेले काँग्रेसचे नगरसेवक बॅनर घेऊन सभागृहात गेले. ऑनलाईन सभेच्या नावाखाली बोलण्याची संधी नाकारल्याचा आरोप करून धारेवर धरले. यावरून विरोधक व पदाधिकाऱ्यांमध्ये  बाचाबाची झाली. काँग्रेसचे नगरसेवक नंदू नागरकर यांनी टेबलावर थाप मारताच महापौर राखी कंचर्लावार यांनी त्यांच्याच नावाची नेमप्लेट भिरकावली तर स्थायी समितीचे सभापती रवी आसवानी हे आसनावरून खाली उतरून नागरकर यांच्यावर अंगावर धावून गेले व अश्लील शिवीगाळ केली. दोघांमध्ये धक्काबुक्कीही झाली. दरम्यान, नगरसेवक पचारे यांनी आसवानी यांना शांत केले.  तर आयुक्त हात जोडून विनंती केल्यानंतर महापौर व स्थायी सभापती कक्षात निघून गेल्याची चित्रफित समाज माध्यमांमध्ये व्हायरल झाली आहे.

नंदू नागरकर यांच्यावर निलंबनाची कारवाई
मनपाच्या सभागृहात सर्वसाधारण आमसभा सुरू असताना विनापरवानगी प्रवेश करत सभागृहात गोंधळ घातल्याचा ठपका ठेवून नगरसेवक नंदू नागरकर यांच्यावर महाराष्ट्र महानगरपालिका अधिनियम महापालिकेचे कामकाज प्रकरणमधील २ (१) नुसार निलंबित करण्याचे निर्देश महापौर राखी कंचर्लावार यांनी दिले.

 

Web Title: Rada in the ruling party and Congress in the meeting of the corporation

Get Latest Marathi News , Maharashtra News and Live Marathi News Headlines from Politics, Sports, Entertainment, Business and hyperlocal news from all cities of Maharashtra.