हिडमाचे उदात्तीकरण, गाण्यावर थिरकणे हे कायद्याचे उल्लंघन; दाखल होईल गुन्हा

Chandrapur : जहाल नक्षलवादी कमांडर हिडमा हा केवळ गुन्हेगार नसून, बंदी घातलेल्या सीपीआय (माओवादी) संघटनेचा तो धोकादायक चेहरा आहे. सन २००९ ला त्याच्या संघटनेला बॅन केले आहे.

लोकमत न्यूज नेटवर्क
चंद्रपूर : जहाल नक्षलवादी कमांडर हिडमा हा केवळ गुन्हेगार नसून, बंदी घातलेल्या सीपीआय (माओवादी) संघटनेचा तो धोकादायक चेहरा आहे. सन २००९ ला त्याच्या संघटनेला बॅन केले आहे. त्यामुळे त्याचे सोशल मीडिया किंवा सार्वजनिक कार्यक्रमांत होणारे उदात्तीकरण आता पोलिसांच्या रडारवर आहे. परिणामी त्यांच्या गाण्यावर थिरकणे किंवा त्याचे समर्थन करणे हा केवळ करमणुकीचा भाग नसून, कायद्याचे उल्लंघन आहे. 

गडचिरोलीत दाखल झालेले गुन्हे हे केवळ कारवाईसाठी नसून समाजात जनजागृती करण्यासाठी आहेत. नक्षलवाद्यांना 'हिरो' बनवण्याचा प्रयत्न केल्यास त्याचे कायदेशीर परिणाम किती गंभीर असू शकतात, हे तरुणांना कळावे यासाठी हे पाऊल उचलले आहे, असे विशेष पोलिस महानिरीक्षक संदीप पाटील यांनी मंगळवारी पत्रकारांशी बोलतांना सांगितले.

सोशल मीडिया, विशेषतः यूट्यूबवर हिडमाच्या नावाचा वापर करून तरुणांना आकर्षित करणारे जे व्हिडिओ आणि गाणी आहेत, ती पोलिसांच्या रडारवर आहेत. आम्ही अशा प्रकारचा घातक मजकूर यूट्यूब प्रशासनाला कळवून तो तातडीने हटवण्याची प्रक्रिया सुरू केली आहे. अनेक कंटेंट आतापर्यंत डिलिट केले आहेत. नक्षलवाद्यांच्या डिजिटल प्रसाराला चाप लावण्यासाठी आम्ही 'इंटेलिजन्स ब्युरो' आणि 'एनआयए' यांसारख्या केंद्रीय संस्थांशी संपर्कात आहोत. तांत्रिक माहितीची देवाणघेवाण करून नक्षलवाद्यांची ही विचारसरणी पसरवणाऱ्या मुळापर्यंत पोहोचण्याचे प्रयत्न सुरू असल्याचेही सांगितले. यावेळी पोलिस अधीक्षक आयुष नोपाणी, अतिरिक्त पोलिस अधीक्षक इश्वर कातकडे, परीवेक्षाधिन पोलिस अधीक्षक गौरव कायंदेपाटील, एसडीपीओ प्रमोद चौगुले, एसडीपीओ सुधीर नंदनवार एलसीबी पोलिस निरीक्षक अमोल काचोरे यांच्यासह सर्वच एसडीपीओ उपस्थित होते.