सावरगाव मामा तलाव व बारबन देवस्थान परिसर : शेतकऱ्यांना दर्शन दिल्याने भीतीचे वातावरण
सावरगाव : नागभीड तालुक्यातील सावरगाव येथील कन्हाळगाव मार्गालगत असलेल्या मामा तलाव व बारबन देवस्थान परिसरात पट्टेदार वाघिण तिच्या दोन बछड्यांसह वावरत आहे. दरम्यान, अनेक शेतकऱ्यांना तिचे दर्शन झाल्याचे सांगितला जात आहे. त्यामुळे शेतकऱ्यांत व सावरगाव - कन्हाळगाव या मार्गाने वहिवाट करणाऱ्या नागरिकांत भीतीचे वातावरण पसरले आहे. बंदोबस्त करून दिलासा द्यावा, अशी मागणी करण्यात आली आहे.
सावरगाव परिसरातील अनेक गावांत शेतीचा हंगाम पूर्ण झाल्याने धान चुराई सुरु आहे. धान चुराई मशीन रात्री-बेरात्री शेतात येते त्याच वेळी शेतकऱ्यांना त्यांच्या शेतात उपस्थित राहवे लागते. कन्हाळगाव मार्गालगत असलेल्या येथील मामा तलाव व बारबन देवस्थान परिसरात सावरगाव येथील अनेक शेतकऱ्यांचे शेत आहेत. मात्र सदर परिसरातअनेक शेतकऱ्यांना वाघिण तिच्या दोन पिल्लांसह आढळून आल्याने सावरगाव व कन्हाळगाव परिसरात भीती निर्माण झाली आहे. या परिसरात झुडपी जंगल व छोटासा टेकळीवजा भाग आहे. शिवाय रांजीचे झुडूप आणि खोल वाही आहे. येथे वाघिणीची नित्याची वहिवाट असल्याचे नागरिकांकडून बोलले जात आहे.
मागील काही दिवसांपासून या परिसरात पट्टेदार वाघही अनेकांना दिसला.त्यामुळे सायंकाळी व रात्रीच्या वेळी सावरगाव -कन्हाळगाव मार्गाने ये -जा करने नागरिकांनी टाळले होते. मात्र आता वाघिनही या परिसरात मुक्त संचार करीत असल्याचेदहशत पसरली आहे. दरम्यान काही अनुचित घटना घडू नये. यासाठी खबरदारी म्हणून या बाबीकडे वनविभागाने गांभीर्याने लक्ष घालावे. अशी मागणी नागरिकांनी केली आहे.