ब्रह्मपुरी : शहरातील कुर्झा येथील रहिवासी व नगरपालिकेचे बांधकाम सभापती विलास विखार हे शेतकऱ्यांमधील वाद सोडविण्यासाठी गेले असता त्यांनाच जबर मारहाण करण्यात आली. ही घटना बुधवारी रात्री घडली.
बुधवारी रात्रीच्या सुमारास कुर्झा येथील नगरसेवक विलास विखार यांच्याकडे काही शेतकरी धान विक्रीची समस्या घेऊन आले. लोकप्रतिनिधी असल्याने समस्या निपटारा करण्यासाठी प्रयत्न केला. धान्य व्यापारी रजत रामकृष्ण थोटे यांनी सहा महिन्यांपूर्वी दहा-पंधरा शेतकऱ्यांकडून २३०० प्रतिक्विंटल प्रमाणे धान खरेदी केले; पण रजत हा आता १८०० रुपये प्रतिक्विंटलप्रमाणे धान्याचे पैसे शेतकऱ्यांना देत होता. पण शेतकऱ्यांना २३०० प्रतिक्विंटल दर पाहिजे असल्याने ते शेतकऱ्यांना मान्य नव्हते. यासाठी नगरसेवक विलास विखार हे रजत रामकृष्ण थोटे, रामकृष्ण थोटे, शुभम थोटे यांच्याकडे शेतकऱ्यांना घेऊन गेले असता ‘तू कोण आहेस’, असे बोलून रामकृष्ण थोटे यांनी नगरसेवक विलास विखार यांच्या डोक्यावर विटेने जबर मारहाण केली. संबंधित दोन्ही मुलांनी शिवागाळ करून जिवे मारण्याची धमकी दिली. विखार यांनी रक्तबंबाळ अवस्थेतच ब्रह्मपुरी पोलीस स्टेशनला तक्रार दाखल केली. तक्रारीवरून तिन्ही आरोपींविरोधात कलम ३२४, ५०४, ५०६, ३४ अन्वये गुन्हा दाखल करण्यात आला. पुढील तपास पोलीस निरीक्षक रोशन यादव यांच्या मार्गदर्शनाखाली साहाय्यक पोलीस निरीक्षक आशिष बोरकर करीत आहेत.