बुलडाण्यात आपचा फुगा फुटला!

बुलडाण्यात लोकसभा मतदार संघातील आम आदमी पार्टीचे उमेदवार सुधीर सुर्वे यांना ३४२९ मतदानावर समाधान मानून पराभव पत्करावा लागला आहे.

बुलडाणा: जनलोकपाल आणि भ्रष्टाचाराचा मुद्दा प्रकाशझोतात आणून दिल्ली काबीज केलेल्या आम आदमी पार्टीचा लोकसभा निवडणुकीत मात्र फुगा फुटला. बुलडाण्यात लोकसभा मतदार संघातील आम आदमी पार्टीचे उमेदवार सुधीर सुर्वे यांना ३४२९ मतदानावर समाधान मानून पराभव पत्करावा लागला आहे. दिल्ली येथे झालेल्या विधानसभा निवडणुकीत आपचे अरविंद केजरीवाल यांची जादू चांगलीच चालली होती. यातून आम आदमी पार्टीकडून लोकसभा निवडणूक २0१४ साठी उमेदवार रिंगणात उतरविण्यात आले. बुलडाणा लोकसभा मतदार संघाच्या निवडणुकीमध्ये झाडू हे चिन्ह वापरून आम आदमी पक्षाचे सुधीर सुर्वे निवडणुकीच्या रिंगणात होते. शिवसेनेचे प्रतापराव जाधव, राष्ट्रवादीचे कृष्णराव इंगळे आणि अण्णा हजारे सर्मथक अपक्ष बाळासाहेब दराडे यांच्याशी सुधीर सुर्वे यांची लढत झाली; मात्र नरेंद्र मोदीच्या ह्यनमोह्ण मंत्रापुढे आपचा जलवा चालू शकला नाही. असे चित्र आजच्या निकालातून स्पष्ट झाले. बुलडाण्यात प्रचारसभा घेऊन अंजली दमानियासारखी आपची दिग्गज नेता सुर्वे यांना वाचवू शकली नाही. स्वत:ची अनामत रक्कम वाचविता यावी, ऐवढेही मताधिक्यही सुधीर सुर्वे यांना मिळवता आले नाही.               बुलडाणा विधानसभा मतदार संघात सुर्वे यांना ५१२ मते, चिखली मतदार संघात ४६६ मते, सिंदखेडराजा मतदार संघात ४१३ मते, मेहकर मतदार संघात ४५७ मते, खामगावमध्ये ८0२ मते आणि जळगाव जामोद मतदार संघात ७६४ आणि पोस्ट बॅलेट पेपरची ६ अशा एकूण ३४२९ मतांवर समाधान मानून पराजय पत्कारावा लागला.