बुलडाणा: बुलडाणा लोकसभा मतदारसंघात प्रत्येक विधानसभा मतदारसंघात शिवसेनेने आघाडी घेतली, याचा आगामी निवडणुकीवरही परिणाम होऊ शकतो. या निकालाचे सर्वजण विेषण करीत असून, कुणाचा फायदा कुणाचा तोटा होऊ शकतो, याचे मूल्यमापन सध्या केले जात आहे. प्रत्येक मतदार संघात समीकरणे वेगळी असतात. उमेदवारावर बरेच काही अवलंबून असतात; मात्र तरीही हा निकाल अनेकांना धडकी भरविणार ठरला आहे.
**फायदा की तोटा?
* बुलडाण्यात सेनेचे दोन गट आहेत; मात्र निकालामध्ये सेनेची एकसंघ ताकद दिसली. त्याला मोदी लाटेची जोड मिळाली. भविष्यात एकसंघ सेना व काँग्रेसचा उमेदवार कोण यावरच आ.शिंदे यांचे गणित राहील. खामगावात आ. सानंदा यांचा एकछत्री अंमल आहे, दोन्ही लोकसभा निवडणुकीत सेनेला आघाडी मिळाल्यावरही त्यांनी आपली ताकद कायम ठेवली, यावेळी मात्र त्यांना मोठे आव्हान उभे ठाकणार आहे.
* चिखलीत भाजपामध्ये अर्धा डझन उमेदवार तयार आहेत. यांच्यामधील स्पर्धा वाढली तर आ. बोंद्रे यांना फायदाच होईल; मात्र एक उमेदवार ठरला तर संघाचे नेटवर्क व काँग्रेसची गटबाजी आ.बोंद्रे यांना अडचणीचे.
* सिंदखेडराजा हा राकॉंचा नव्हे तर आ.डॉ.शिंगणे यांचा गड आहे, यावेळी मात्र मतदारांनी त्यांचेही ऐकले नाही व सेनेला सर्वाधिक आघाडी दिली. दिल्लीत भाऊ व मुंबईत साहेब हेच सूत्र कायम राहिले तर आ.शिंगणे निश्चींत.
* मेहकर हा प्रतापगड आहे, गेल्यावेळी त्याला सुरूंग लावण्याचा प्रयत्न झाला होता; मात्र अपयशी ठरला. यावेळी तर भरभरून मतदान झाले, त्यामुळे विधानसभेत प्रतापराव हे डॉ.रायमुलकर यांच्यासाठी प्रतिष्ठा लावतील.
*जळगावमध्ये आ.डॉ.संजय कुटे यांच्याकडे सर्वांचे लक्ष होते. त्यांनी मताधिक्य दिले आता विधानसभेत ते कुणाचा मामा करतात, हे प्रतिस्पर्धी उमेदवार कोण यावरच ठरेल सध्यातरी ते सेफ झोनमध्ये आहे.